Vervatoxa Meclîsê Cinîyan a DEM Partî qezaya Kartalî ya Îstanbul de bi şîarê ''Ma vera feqîrîya cinîyan, cuyeya azade wazenê'' şayîya cinîyan kerde. Pîya bi Vervatoxa Meclîsê Cinîyan a DEM Partî Halide Turkogulu  îdarekarê DBP, TJA û DEM Partî yê bajar û qezayan tewrê şayîye bîyî. Cinîyê ke bi kincanê herêmî tewrê şayîye bîyî sloganê , “Jin, jiyan, azadî” vatî.

 Badê qiseykerdişê akerdişî Halide Turkoglu qisey kerd. Halide Turkoglu bale problemanê cinîyan ser û nê vatî: ''Ma her ca de qala feqîrîya cinîyan kenê. Heta ke ma azad û seyyewbînî mebê çew nêeşkeno bibo azad. Ma cinîyî hedefê camêrdan de yê. Ma her warê cuye de feqîrîye dir rî bi rî yê. Meseleya cinîyan eynî wextî de meseleya demokrasîyî ya nê welatî ya.  Her ca de şar vera şer û ratnê îqtîdarî vejîyeno. Kedkarî, dewijî, cinîyî, karkerdî semedê keda xo sere wedarenê. Hetêkî ra hêrişê heqanê ma kenê hetê bînî ra hêrişê ma kenê. Rizqê ma diznenê û bi nê payra manenê.''

 Halide Turkoglu bale ante polîtîkya şîdet, tacîz û qirkerdişî yê îqtîdarî yê vera cinîyan û qijan ser û vat: ''Vera nê polîtîkayan têkoşîno hempar zaf muhîm o. Heme problemî pabesteyê meseleya kurdan ê. Polîtîkayê şerî xespkerdişê îradeyî yo. Êyê ke ma înkar kenê ma zî do înan înkar bikerê. Ma cinîyî do bi serewdaritişê xo tim bibê. Vera şerî yewbîyayîş paştdayîş o. Ma do bi xoverdayîşî ser bikewê. Ma tim vanê Xopawitişê ma rêxistinbîyayîş o. Meclîsê ma wayîrê mîrasêkê pîlî yo. Ma do destûr medê sîstemê îqtîdarî.  Partîya hêvî dana şarî. Ma semedê her kesî demokrasî wazenê. Ma semedê têkoşînî qerardar ê. Çareserîye cinîyan de ya.''

Halide Turkoglu tepiştişê Hemvervatoxa DEM Partî ya  Herêma 1ine ya Îstanblu Dilbere Demir û hêrişê vera bînaya DEM Partî ya Sultangazî şermezar kerdî û vat nê hêrişî nêeşkenê ma rê peyser game bidê eştene.

Badê qiseykerdişan bi deyîranê hunermendanê Merkezê Kulturî yê Mezopotamya govende ameye girewtene. Şayîye ya ke çapik, slogan û tîlîlî tede kêm nêbîyî, bi slogana“Jin jiyan azadî” qedîyaye.