Sebebê saet 14.55 de karî caverdayîşê înan camêrdan ra se ra 26 hîna tay destmiz girewtiş o. Cinîyî anê ziwan ke saet 14.55 ra tepîya karsazan rê belaş xebetênê.

Cinîyî do heme şaristananê pîlan ê welatî de saet 14.55 de kargehanê xo ca verdê. Waştişê cinîyan cîyatîya mabênê destmizê cinî û camêrdan wedarîyo, cuya karî de vernî ro tacîzê cinsîyî bêro girewtene û sektorê ke cinîyî ûca zaf ê cinîyî bibê îdarekar.

Îzlandaya ke dinya de mîyanê welatanê tewr seypêperweran de ya cinîyî, se ra 74ê destmizê camêrdan gênê.

Bi halê nikayênî seypêyîya destmizî yê mabênê cinî û camêrdan ancax serra 2047 de eşkena bêro viraştene.

PÛNCANÊ SÛRAN, FÎTÎLÊ MUCADELEYÎ TAFÎNA

Cinîyê Têgêrayîşê ciwan û şarî yê mabênê serranê 1960 û 1970an sey xeylî welatan Îzlanda de zî têgêrayîşêko xurt ê cinîyan vet meydan.

Cinîyê şorişgêr û femînîstan ê ke xo sey Pûncê Sûrî name kerdêne femînîzmê kanî bi bûrjûwabîyayîş û kîtelyan ra dûrbîyayîş sûcdar kerdî. Seva ke seypêyîya cinsî bica bêro xeylî aktîvîteyî viraştî.

SE RA 90Ê CINÎYAN KAR CA VERDA Û GREV KERD

Roja 24ê Teşrîna verêne 1975 de se ra 90ê cinîyan bi slogana “Hêdî Bes o“ kar ca verda û vejîyayî meydanan.

30 hezar cinîyêke paytext Reykjavik de vejîyayî meydan hukmatî ra waşt ke seva seypêyîya destmizî bica bêro tedbîr bigîro.

Grev û nawitişan mîyanê wextêkê kilmî de tesîrê xo ramot. Hukmatî qerar da ke seva nêseypêyîya destmizî hal bibo komîteyêk bêro viraştene.

QANÛNÊ KARÊ SEYPÊYÎ RÊ DESTMIZO SEYPÊ DO 2020 DE BIKEWO PRATÎK

Par grev û nawitişanê cinîyan ê bi serran meyweyê xo da. Aşma Adare de Meclîsê Îzlandayî qanûno ke cinî û camêrdan rê destmizo seypê bêro dayene qebûl kerd.

No qanûn do 2020 de bikewo pratîk.