Herêma Cizîrî ya Rojawanê Kurdistanî de bi seyan şerwan û fermandaranê Yewîya Pawitişî ya Cinîyî (YPJ) 8’ê Adare Roja Cinîyan a Mîyanneteweyîye pîroz kerd. Pîrozkerdiş bi merasîmêko eskerî dest pê kerd.

Merasîm de fermandarê YPJ'yî Axîn Nûcane, Rojda Felate, Evîn Efrîne, Leyla Waşûkanîye amade bîyî. Fermandare Axîne, merasîm de qisey kerd û 8’ê Adare de heme cinîyanê dinya, Rayberê Şarê Kurdî Abdullah Ocalanî, şexsê Leyla Guvene de xoverdayîşê grevê vêşanîye û têkoşanê cinîyan hemeyan pîroz kerd.

Fermandare  Axîn Nûcane da zanayene ke, ê roja 8’ê Adare  demêko muhîm de pîroz kenê û vat, “Ma bi nameyê hêzanê pawitişê cinîyan ê YPJ'yî nêzdîyê 6 serrî yo vera çeteyanê DAÎŞ’î  têkoşînêkê girdî danê. Roja ewroyî de no hêzo ke heme dinya bi hovîtîya xo tersneno, vera hêzê cinîyan de wareyê cografîk de binkewt. Bi binkewtişê înan reyde ma têkoşînê xo yê wareyê pawitişî nêqednenê. Seba ke hîna hişmendîyêka qirker û îşxalkerê cîniyan ser o esta. Na hişmendîya ke kiştişê cinîyan rewa vînena sebebê têkoşînê ma ya. Ma hêz, moral û îlhamê têkoşînî mîrasê xoverdayîşê cinîyan ê tarîxî ra girewt. No mîras, bi xoverdayîşê ewroyî reyêka bîne şexse Leyla û hevlanê cinîyan ê grevê vêşanîye de reyna gandar bî. No têkoşîn seba cinîyanê dinya û Kurdistanî ame kerdene, seba ma hertim bi bingeyê xurtkerdişê şerê xopawitişî. Ganî ma her roje bikerê roja têkoşînî û seba destkewteyanê serkewtîyan têkoşîn bikerê. No seba ma, amanco tewr serek o. Ma bi wesîleyê na roje vengdayîş bi heme cinîyan kenê û vanê ma têkoşînê xo hempar bikerê û vera sîstemê nêrî, yewîtîya xo ya ruhî, têkoşînê xo xurt bikerê û hêzê pawitişê xo gird bikerê.”

Merasîmê eskerîye ra dima şerwanan şayîya ke amade kerdibî pêşkêş kerde û bi kaykerdişê govendan pîrozkerdişê xo qedêna.