Şêx Murşîd El Xeznewîyo ke seba yewîya neteweyî ya kurdan veng dabi ajansê ma rê qisey kerd.

Şêx Murşîd El Xeznewîyî pare kerd ke eke yewîya kurdan nêra caardene û mîyanê kurdan de nakokîy est bê kurdî do nêresê heqanê xo. El Xeznewîyî vat: ''Eke ma bala xo bidê tecrubeyanê tarîxî ser do bi asanî bivînê ke şorişê ke ser nêkewtê nakokîyan ra sebeb bi. Êyê ke qayîl bîyê ser bikewê terefgîrê îtîfaqî bîyê. Coka ganî şarê kurdî nakokîyanê xo bido kişte. Şorişê kurdan seba ke îtîfaq çin bi bin kewtî.

Rojawanê Kurdîstanî û Sûrîye de tarîxêko newe nusîyeno. Kurdî dinya de hinî wayîrê dostan ê. Eke kurdî amade nêbê senî dostî ardimê ci bikerê? Yanî yewîya kurdan, îtîfaqo sîyasî, îtîfaqê kurdan her wextî ra zafêr lazim ê. A raşte şarê ma seba yewîye amade yo la partîyê ma nîyê. Ganî partîyê kurdan îtîfaq bikerê. Tayê partîyî babete yewîye de tewirêkê zelalî nêmojnenê û menfaetanê xo fikirîyenê. 

Mabênê Mazlûm Ebdî û ENKSî de pêvînayîşo verên virazîya. Ganî nê pêvînayîşî ra dima zî xîretî dewam bikerê. Ganî heyetêkê kurdan o hempar şoro Şamî û pêvînayîşan bikero. Senî ke dişmenî yew benê û seba menfaetanê xo têgêrenê kurdî zî ganî wina bikerê. Partîyê sîyasîyî beno ke wayîrê fikranê cîyayan bê la ganî nînan bidê kişte. PYNK yan zî ENKS nêeşkenê bi sereyê xo yewîye bîyarê ca. Ganî hêverî ê yew bibê.''

Şêx Murşîd El Xeznewîyî ancî wina veng da: ''Pêvînayîşo verên ame kerdene. Proses nika ra pey girîng o. Partîyê sîyasîyî ganî goreyê atmosferî tewirêkê pîlî bimojnê. Ganî partîyî pêvînayîşan bikerê. Ewro Rojawanê Kurdîstanî rojdem de yo. Rojawanê Kurdîstanî hewceyê paştdayîşê têgêrayîşanê kurdan o. Roje a roja ke ma yew bibê. Rojawanî bedelê giranî dayî. Ewro roje roja namus û şerefî ya. Coka ma venga pêro kurdan û partîyan danê ke yew bibê.''