Endama Koordînasyonê PAJK’î Şîmal Ulkem Guneşe derheqê 8’ê Adare Roja Cinîyan a Mîyanneteweyîye  de ajansê ma rê qisey kerd.

Guneşe vist vîrî ke sîstemê pederşahî de cinîyî  timûtim binê hêrişî de yê û va: ‘‘Ma sey rayberê medenîyetê demokratîkî rayîrê azadîye de aver şinê. Ma zanê ke serkewtişê ma zî rayraşîyayîşê azadîya ma zî Îmrali ra ravêreno. Heta ke Rayberîye azad mebo, ma cinî û ciwanî nêeşkenî vajê ke ma rolê xo ardo ca.‘‘

Guneşe va ke roja ke Ocalanî Îdeolojîyê Xelisyayîşî yê Cinî îlan kerd, Têgêrayîşê Azadîye manaya girde barê na roje kerde. Rojêka tarîxî ya.“ Guneşe wina dewam kerd: ‘‘Watşişê ma yo gird o yo ke ma cimatî azad bikerê û sîstemê pederşahî birijnê. Na roje bi keda cinîyan ê xoverdayox û kedkaran vejîyaye werte. Heme dinya vînena ke ma senî xoverdayîşêkê girdî danê. Rayberê ma 21 serrî yo ke Îmrali de esîr o. Ewro rayberîya Leyla Guvene û Nasir Yagizî de semedê azadîya Rayberîya ma xoverdayîş vila beno. Ganî cinîyî her ca de 8’ê Adare bi slogananê xoverdayîşî peşwazî bikerê, bi slogana,‘‘Xoverdayîşê cinîyan keno azad‘‘ peşwazî bikerê.‘‘

Guneşe bale ante ke azo newe îdeolojîya Ocalanî sey mîrasî qebûl keno û va: ‘‘No mîras bi xoverdayîş û gonî heta nê rojan ame. Ewro heme dinya vînena ke cinîya Kurde bi felsefeya Rayber Apoyî xo organîze kena  û aver şina. Cinîyê ciwanî herêmanê muhîman ê şer, xoverdayîş û sîyasetî de xoverdayîşêkê girdî danê. Rayber vano, ‘‘Ma ciwan dest pêkerd do ciwan ser bikewê‘‘ ewro ciwanî ganî bi nê perspektîvî tê bigêrê û sîstemê perderşahî çîn bikerê.‘‘