Şoreşê Rojawanî ewro bîyo şoreşê pêroyê şaran û dînyaye. Peynîya DAÎŞ o ke bibi belayê serê dinyaye Rojawan de ame. Ciwanan bi araq û gonya xo şoreş mûnit û her kesî çi dest ra ame kerd û hîna zî keno.

Ê ciwanan ra yewe zî Xwînda Botane ya. Hîkaye û heyecanê Xwînda eslê xo de hîkaye û heyecanê kedkaranê şoreşî yê. Xwînda Botane serra 2015’î de Cizîra Botan ra beşdarê Şoreşê Rojawanî bena. Heta nika kesî goşdarîya hîkayeyanê şoforanê YPJ’yî nêkerda û naye ra zî ma wazenê ke şoforîya cepheyi ser aye de qisey bikê. La Xwînda vana heta ke ez beşdarbîyayîşê xo yê şoreşî ke qisey mekî, hîkaye kêmî manena.

EZ ÇIRA BEŞDARÊ ŞOREŞÎ BIYA?

“Merdim ke beno pîl tayê çiyan hina baş vîneno. Merdim vîneno ke yew şar esto, ti zanî/a ke heqê to estê, la dewlete verê heqanê to de vindena û qet çiyêk to qebul nêkena. Dewlete vana ‘ti tîya de nêeşkena/î goreyê waştena xo biciwîye/î, ziwanê xo nêeşkena/î qisey bika/î, domananê xo goreyê waştena xo nêeşkena/î bîka/î pîl’. Ya ti sey vatena dewlete kena û waştenanê xora fek veradana, yan zî vera dewlete mücadele kena. Mi zî sey yew ciwana Kurde no qebûl nêkerd. Mi dî ke çimanê mi ver de yew prosesê şoreşî dest pêkerdo. Yew parçeyê şarê mi, seba azadîye mücadele keno. Ez zî seba ke binê bayraqa welatê xo de şer bika, beşdarê mucadeleyî bîya.”

ŞOREŞ DE BEŞDARBÎYAYÎŞO BIŞERT NÊBENO

Şer de wesayîtî zaf muhîmê û her tim hedefê dişmenî de yê. Ma zî Xwînda ra persa ke fikrê şofortîya  cepheyî senî ameyo aye vîrî û çira nê karî kena. Xwîndaye wina va: ”Şoreş de beşdarbîyayîşo bişert nêbeno. Şer de ez nê kena, nê nêkena nêno vatene û xora çiyo winasî zî şorişgêrane nîyo. Kamcî het de ke îhtîyacîye bibo, ganî merdim o het de bo û çiyo ke tewr baş dest ra yeno, ganî ey bikero. Eke hewce bikero merdim beno şerwan, beno şofor. Ez çend serrî yo ke nê karî kena.”

DÎSÎPLÎNÊKO PÊT WAZENO

Xwînda vana no kar karê dîsîplînê pêtîyî yo û ganî merdim her wext payan ser amade bo. Qaso ke Xwînda vana ganî her roj kontrole wesayîtan bêro kerdene û xeta şerî de wesayîtî tim bi wezîyetê xebatî de vinderê. Çunke her deqa xetereyê hêrişê fuze, teqayîşê mayînî, hawayê pêkewtişî estê û ganî merdim rewşa hawa û rayîrî baş bizano.

GE-GE BIRÎNDARAN BENA, GE-GE ZÎ CEBIRXANE

Xwînda Botane wîna dewam kena: ”No şerêko girano û teknîko giran yeno şuxulnayene. No sebeb ra zî no şer de wesayîtî zaf muhîmê. Her wext seba her çiyî ganî merdim amade bo. Ge-ge hewce keno ke ganî ti cayêko ase ra yew birîndarî bivejê, gegane ganî ti cebirxane biresnê embazanê xo. No sebeb ra zî ganî merdim bi dîsîplîn tê bigêro û amade bo.”

TI HEM HEVAL, HEM DOKTOR, HEM Zİ ŞOFOR A

Qaso ke Xwinda vana, a tena şofore niya û wina dewam kena: ”Karo tewr zor, cayê pêkewtişî ra, vetişê yew birîndarî yo. O wext ti hem doktor-hemşîra ya, hem heval a, hem zî şofora û ganî rew û wext de biresnê ca. Wexto ke ti yew brîndarî wesayîtî ra kena espar tena yew çi fikirîyena vana ganî hevalê mi nêmiro.”

EFRÎN RA BIGÊ HETA DÊRAZOR HER CEPHE DE

Xwînda serra 2015’î ra nat Şedade ra bigê heta  Reqa û Efrînî xeylî cepheyan de kewta şer û nika zî Dêrazor de ya. Xwînda vana, şer her cephe de zor o wina dewam kena: ”Şero ke  zor dayo mi, şerê Efrînî bi. Çunke uca  şertê ma û dişmenî sey yewbînî nêbî. Tim teyareyê şerî ma ser o gêrayêne û hêrişê hewayîyî zaf ameyêne kerdene.”

WEZÎFEYO TEWR ZOR

Xwînda emrê xo yê ciwanî de, xeylî şeran de, wezîfeyê zaf giranî girewtê xo ser. Xwînda yew persa ma rê cewabo winasî da: ”Efrîn de nuqtaya ke ma tede bîyî bîye deşîfre û leşkeranê dewleta Tirkî bi obusan hêrişê ma kerd. Ma çar embazî bîyî û ma çarmîna zî bîyî birîndar. Birîna mi zaf xirabe nebiye la fermandarê ma Artêş Geverî birîna girane girewte. Mi bi zor û zehmet her hîrê embazî wesayîtî ra kerdî espar. Birîna Artêş Geverî girane bîye la reyna zî kerdêne ke moral bido ma. Ez vejîya rayîr û mi wesayît vera Efrînî ramit. Mi waşt ke ez wextêko kilm de biresa nêweşxane. Ez reşta nêweşxane, la heval Artêş Gever  şehîd kewt. Nika zî eke o heval ke yeno mi vîr, ez nêeşkena îstiranê çimanê xo bida vindertene..”