Fermandarîya Pêroyî ya Yewinanê Pawitişê Cinîyan (YPJ) bi wesîleya serrgêra 11. ya Şorişê Rojawanî mesajêk weşana. 

Mesaj wina yo:

''Erdê Rojawanî de serkêşîya cinîyan de ferasetê şorişî yê şaran cuyêka newîye awan kerde. Herême binê krîzanê polîtîkayanê BAAS û hegemonan de firsendê dîyarkerdişê qederê xo aferna. Ma zî qerar da ke sîstemê konfederalîzmî awan bikerê. Ma hêzê xo erdê xo pawit û game bi game azad kerd.

Şorişê Rojawanî komelo ekolojîk, demokrat û azadîwazê cinîyan esas girewt û nê esasî ser o YPJyî zî mesuldarîya azadîya komelî girewte xo milî. Cinîyan hema destpêk de refanê YXK-YPGyî de cagirewt û rêxistinîya xo awan kerde. YPJ bi modelê hêzanê xopawitişî. Bi Şorişê Rojawanî cinîyan heqê xo yê tewr meşrûyî vistî destî. Waranê şerî de estbîyayîşê cinîyan bingeyê pawitişê erjanê komelî de aver şi. Şerwananê YPJyî nê esasî ser o bi erjanê şerê şarî yê şorişgêrî nasname, estbîyayîş, ziwan, kultur û îradeyê şarê xo pawit. Coka Şorişê Rojawanî bi YPJyî resa manaya xo ya raştikêne.

YPJ do vera polîtîkayanê îmha û tecawuzî têkoşinê xo rê dewam bikero. Ma 11 serrî bi têkoşîn, qehremanî, xoverdayîş û fedayîtî xo pey de verdayî. Şarê ma nê prosesî de tim hetê ma de bi.

Zaf fermandar û şerwananê ma yê ercîyaye û serkêşan seba Şorişê Cinîyan ê Rojawanî ganê xo dayî. Ma do tim erjanê înan teqîb bikerê û seba mendekerdişê şorişî têkoşîn bikerê. Nê esasî ser o sere de ê şarê herême ma serrgêra Şorişê 19ê Temmuze pêro cinî û şaran rê fîraz kenê.''