Cinîyan ê kurdan û enternasyonalîstan ê ciwanan şaristanê Aachenî de forumê 'Ganî merdimî senî biciwîyê' kerd. Forum çarçewa kampanyaya ‘’Jin, jiyan, azadî- azadiyê bi ser bixe’’ de ame kerdene.

Salona forumî de kitabê Rayberê Şarê Kurdî Abdullah Ocalanî, standê kitaban, 'dara cuye' û plaketê serê cuya Ocalanî de ronîyayî.

Forum de bale ameye antene fikran û felseya Jineolojî yê Rayberê Şarê Kurdî ser û ame parekerdene ke ewro formulê 'Jin, Jiyan, Azadî' pêro dinya rê vila beno. 

Qiseykerdişan ra dima mesajê têgêrayîşanê cinîyan ê Şingal û Rojawanî ameyî temaşekerdene.

Forum de atolyeyê Jineolojî û xopawitişî ameyî kerdene, derheqê 'Raştîya Rayberîye' de semînerêk ame dayene. Semîner de ame vatene ke îdeolojîya azadîya cinîyan a Ocalanî ewro bîya sîstemêkê cuye yo newe. 

Cinîyan vat ke ê do fikrê neteweya demokratîke û azadîya Abdullah Ocalanî bikerê esasê têkoşînê xo. 

Forum bi slogananê ‘’Bijî Serok Apo’’ û ‘’Jin, jiyan, azadî’’ qedîya.