Hemsereka KCD’yî û parlamentera HDP’yî ya Colemêrgî Leyla Guvene seba qedînayîşê tecrîdkerdişê Rayberê Şarê Kurdî Abdullah Ocalanî 130 rojî yo ke grevê vêşanîye de ya.

Pîya bi keynaya Guvene Sabîha Temîzkane, hemsereka Delegeyanê KCD’yî yê Amedî, kedkara weşîye Zelal Bîlgîne û aktîvîsta Têgêrayîşê Cinîyanê Azadan (TJA) Fîgen Ektî zî Guvene reyde manena. Ektî şahidanê xoverdayîşê Guvene ra yew a. Roja ke Guvene zîndan ra vejîyaya, her hîrê cinîyî 51 rojî yo, 24 saetî Guvene reyde yê. Aktîvîsta TJA Ektî qalê xoverdayîşê Leyla Guvene kerd.

Ektî vat, Guvene saet 8 de dest bi roje kena û dimayê bicaardişê îhtîyacîyanê xo yê bingeyênan dest bi şopnayîşê rojdemî kena û vat, “Teber ra yan zî zîndanan ra aye rê peyamî yenê. Ma înan aye rê wanenê. Sîyasetê dinya, Rojakewtena mîyanêne, yê Kurdistan û Tirkîya şopnena. Ma zî rojdemê bingeyênî aye rê wanenê. Aye zî rojdemî ercnena.”

Ektî ard ziwan ke Guvene weçînitişanê cayîyan ê 31’ê Adare sey perçeyêkê nê prosesî vînena û seba aye zaf muhîm o ke îradeyê şarî yo ke hetê qeyûman ra ameyo desteserkerdene bi weçînitişî newe ra bêro destfînayene.

Ektî da zanayene ke halê weşîye yê Guvene roj bi roje xirab beno la morale aye xeylî berz o û vat, “Vajê nêvajê bedenê aye xeylî bîyo rincan. Seba paştîdayîşî waştişê serdane teber ra yenê kerdene, labelê ancax ma 10-15 rojan ra reyêk eşkenê destûrê serdane bide. Çunke nê rojanê peyênan de harîge bîye. Naye ra ma neçar ê ke bi dîqet tê bigêrê.”

Ektî qalê tesîrê Guvene serê aye de senî bîyo kerd û vat Guvene ramot ke ganî vindertişê cinî cuye de senî bo. Ektî vat, “Ez nizdîyê 30 serrî yo ke mîyanê sîyasetê aktîfî de ya. Eşkena vajî ke reya ewilên a ez bi hawayêkê binîzamî babetan ser o xorî bena.”

Ektî ard ziwan ê dewrêkê xoverdayîşî de yê û vat, “No xoverdayîşêk o ke payîz xo ra dima verdayo, zimistan ravêrto û dest bi xoverdayîşî kerdo. Leyla cemreyêk a, ke tanîya xo daya hewa, awe û erdî. Cemreyêk a ke wisarî xo dir ana. Naye ra ez mûsaya ke bi hîna hawayêkê hîrayî babetan ser o xorî bibî. Ez mûsaya ke senî cinîyêk eşkena cuye biaferno, probleman çareser bikero.”

Ektî tewr peynî de ard ziwan ke Leyla Guvene xoverdayîş bi înan dayo famkerdene û vat, “Her gama ke ma bermenê ma ra vana, ‘Mebermê, no xoverdayîş o. Ez tradîsyonê xoverdayîşê Çaran, Kemalan, Xeyrîyan û Mezlûman ra yena.”