Heyetê Cinîyan ê Îdareyanê Herêmîyan ê Partîya Demokratîke ya Şaran (HDP) bi wesîleya serrgêra caakerdişê qeyûman verê Şaredarîya Bajarê Pîlî yê Amed de eşkerayîye daye.

Aktîvîstê TJA, Dayîkê Haştîye, îdarekarê DBP û Partîya Çep a Keske û xeylêk wekîlî tewrê eşkerayîye bîyî.  Eşkerayîye de pankartê “Ne qeyum ne talan, dîsa jin dîsa jiyan” ame akerdene û cinîyî bi slogana “Jin, Jiyan, azadî” û çapikan kewtî warê çalakîye.

Eşkerayîye ra qismêk wina yo: ''Bi Dawaya Kobenê û Dawaya Qefilnayîşê HDPyî û operasyonanê qirkerdişê sîyasîyî yeno waştene ke verê sîyasetê demokratîkî bêro girewtene. Tecrîdê serê Rayberê Şarê Kurdî Abdullah Ocalanî her warê cuyeya komelkîye ra vila bîyo.Şertanê wina zehmetan de vîjnayîşê serekkomarîye ame kerdene ke ma sey cinîyan  nê meşrû nêvînenî.

Goreyê netîceyanê fermîyan ê vîjnayîşê 2019î  partîya ma şaredarîyê 3 bajaranê pîlan, 5 bajaran, 45 qezayan û 12 bajarekan bi temamî 65 serekîya şaredarîyan, hezar 230 endamîya meclîsanê şaredarîyan û 101 endamîya meclîsê pêroyî  fînayî dest. Nê 65 şaredarî ke partîya ma fînayî dest, bi sîstemê hemşaraedarîye ameye îdarekerdene û na çarçewede meclîs, heyet, koordînasyon û komisyonê cinîyan ameyî ronayene. Hîrê şaredarîyanê bajaranê pîlan de Serekîya Daîreya Polîtîkayanê Cinîyan ameyî aktîfkerdene û heme şaredarîyanê bînan de mudirîyîye cinîyan ameyî ronayene. Reyna xebatê sey kooperatîf, sera, warê ramitişî û bazarê cinîyan ameyî destpêkerdene.  Şewêke de nê şaredarîyî ameyî xespkerdene. 19ê tebaxa 2019î de Şaredarîye Bajaranê Pîlan ê Amed, Wan û Mêrdînî de qeyûm ame cakerdene. Sîstemê hemserekî sey sûcî ame hesibnayene û sey sebebê qeyûmî ame mojnayene.

TêkoşînO hempar ê cinîyan do peynîya zîhnîyetê qeyûmî bîyaro. Bi şîarê  'Jin jiyan azadî’ têkoşînê cinîyan dinya de vila beno. Bi nê şîarî ewro Rojawan de komelêko newe yo ke demokrasîyê herêmî esas geno yeno înşakerdene û Îran de vera rejîmê dişmenê cinîyan têkoşîn yeno dayene. Heqîqetêk wina vano: 'Şorişo ke cinîyan azad nêkeno, şoriş nîyo.' Ewro cinîyê ke têkoşînê azadîye û secîyeyîye danê û şarê dinya dormeyê nê heqîqetî de ameyî têhet. Îqtîdaro faşîst ê AKP-MHPyî bi zextan û qeyûman nêeşkeno verê cinîyan bîgêro. Ma cinîyî vanê ke; Ma do pawitişê destkewteyanê cinîyan rê dewam bikerê. Ma do cuyeya ke cinîye tede kerdox a, newera înşa bikerê. Ma do bi na qerardarîye vera heme texrîbatan bibê rayîrê çareserî yê hêvî azadîye û seycîyeyîye.''