Amed de 8’ê Adare: Xoverdayîşê Guvene ame silamkerdene

Amed de cinîyî bi wesîleya 8’ê Adere vejîyayî kuçeyan. Mîtîng de xoverdayîşê Leyla Guvene û cinîyan ê Rojawanî ame silamkerdene. Cinîyan mesajê serewedartişî dayî.

Bi wesîleya Roja Cinîyan a Mîyanneteweyîye Amed de cinîyî Meydanê Îstasyonî de ameyî pêser. Cinîyan bi sloganan vera zulm û dîktatorîye mesajê girdkerdişê xoverdayîşî dayî.

Mîtîng de Vervatoxa Meclîsê Cinîyan  ê HDP’yî û parlamentera Agirî Dîlan Dîrayet Taşdemîre qisey kerd.

LEYLA GUVENE VERNÎYA MA ROŞT KENA

Taşdermîre  bale ante xoverdayîşê Leyla Guvene ke 121 rojî yo dewam keno ser û va: Ewro vera faşîzmî yew cinî prosesî roşt kena. A cinî Leyla Guven a. Xoverdayîş rê rayberîye kena û vernîya ma roşt kena. Guvene zana ke tecrîd yeno çi mehne. Tecrîd kaos û zext o. Tewr zaf zî cinî ser tesîr keno.  Heta ke tecrîd bibo çew azad nêyo. Heta ke tecrîd bêro wedartene do xoverdayîşê ma dewam bikerê. 2015 de wextê muzakereyan de Birêz Ocalan vano ke, ‘‘Heta na masa de yew cinî çîne bo ne azadîye ne zî aşîtî beno.‘‘ Nizbîyayîşê Ocalanî yê cinîyan yeno zanayene coka tecrîd yeno xorîkerdene. Guvene zî naye zana. Coka bale ancena tecrîdî ser û cinîyan  dawetê xoverdayîş  kena.‘‘

Taşdemîre xoverdayîşê cinîyan ê Rojawanî zî ard vîrî û va: ‘‘Rojawan de cinîyan modelêko newe yê cuya  dayo ciwîyayene. Ma nê cinîyan ê ke vera DAÎŞ’î şer kerd û heme dinya rê bîyî nîmûne silam kenî.  Zîhnîyetê DAÎŞ’î ewero her ce esto. Ma do 31‘ Adare de nînan tîya ra pak bikerê.‘‘

Taşdemîre vatişê Erdoganî, ‘‘Tîya ra şorîn, Kurdistan çîn o‘ vist vîrî û va ê ke ganî na herre ra şorî ê bi xo yê. Kurdistan esta, na herra Kurdistanî ya.‘‘

Taşdemîre ra dima mesajê Guvene ame wendene. Guvene roja cinîyan pîroz kerde û vat bi yewbîyayîş û xoverdayîşî ma do ser bikewê.

Reyna qiseykerdişanê bînanî de zî polîtîkaya herişkare ya hukmatî ameyî rexnekerdene û mesajê serewedartişî ameyî dayene. Mîtîng bi deyîran û goveng de  qedîya.