Amed de nê hewteyî de 3 cinîyan bi hawayêkê şikdarî xo kişt û cinîyêk zî ameye qetilkerdene. Torra Têkoşînê Vera Şîdetê Serê Cinîyan kuçeyê Ofîsî yê qezaya Yenîşehîrî de eşkerayîyêke kerde. Cayo ke cinîyan eşkerayîye kerdêne hetê polîsan ra ame dormegirewtene. Cinîyan sloganê ''Cinîye, Cuye, Azadîye'', ''Cinîye cuye ya mekişê'', ''Ti do têna nêba'', ''Ma nêtersenê, heş nêkenê û îtaat nêkenê.'' vatî.

Bi nameyê Torra Têkoşînî Sereka Komleya Cinîyan a Rosa Adalete Kaya eşkerayîye wende û îfade kerd ke şîdetê vera cinîyan zêdîyeno û komel ge ge vera nê cînayetan bêveng maneno. Kaya vat: "Ma ra yewe zî do kêm nêba, ma seba ke serewedaritişê xo pîl bikerê tîya de yê. Ma vanê ke cînayetê cinîyan şikdar ê. Çunke ma zanenê ke cinîyî rîyê tedaya camêrdan ra xo kişenê yan zî hetê camêrdan ra yenê qetilkerdene û mergê înan sey xokiştişî yenê mojnayene. Ma do nê xokiştişan dima de yê û heta ke rastîyan nêvînê ma do nêvinderê."

Kaya da zanayene de kiştoxê Denîze Ketira ke 26ê kanûne de verarê ci de gergûşê ci ameyebî qetilkerdene, hema zî nêame dîyene. Kaya vat: "Camêrda 2019 de Amed de 13 cinîyî qetil kerdî. 3 xokiştişê şikdarî ameyî meydan. Goreyê doneyan cînayetê cinîyan do bibê zêde. Cinîyî cayêkê tewr biasayîşî de hetê tewr nêzdîyanê xo ra yenê qetilkerdene. Kiştoxê înan babî, bira, waştî, camêrd yan zî camêrdê înan ê verênî yê.  Camêrdê ke vanê 'Cinîyêke çin a ke ma tede bizewijê' seba heqê nafaka cera Peymana Îstanbulî û qanûnê 6284î vindenê."

Kaya eşkerayîye ra dima derheqê Qirkerdişê Roboskî û Cîhan Canî de zî qisey kerd û vat: "Nê pêro mojnenê ke cografyaya ma de şîdet ame normalîzekerdene. Nê serebûtî bi vatişê 'qezayî' nênê nimitene. Nê serebûtî kenê ke pederşahîye komelî ser o haîm bibo û şîdetê vera cinîyan bibê zêde."

Eşkerayîye bi zilgitan û sloganan qedîyaye.