Ronayoxanê PKKyî ra Sakîne Cansiz (Sara), temsîlkara KNKyî ya Parisî Fîdane Dogan (Rojbîne) û endama Têgêrayîşê Ciwanan Leyla Şaylemez (Ronahî) 9ê çeleyê 2013î de paytextê Fransa Paris de ameyî qetilkerdene.

Endama Konseya Leşkerî ya YJA-Starî Rojda Amed bi wesîleya serrgêra Qirkerdişê Parisî ANF reyde qisey kerd. Amede şexsê Sara, Rojbîne û Ronahî de pêro şehîdî bi mînetdarî yad kerdî û Qirkerdişê Parisî bi hawayêkê xurtî şermezar kerd.

Amede vat: "Dewleta tirke serra 2013î de mîyanê tengasîye de bîye coka waşt ke Rayberê Şarê Kurdî Abdullah Ocalan reyde pêvînayîşan bika. Bi çalakîyanê gerîlayan, bi taktîkanê cîyayan ê çalakîyan dişmenî mîyanê tengasîye de bîye. Rayberê ma waşt ke bi hawayêkê raştî nê prosesî teqîb bikero û biercno. Seba caardişê prosesî Rayberê ma tay gamî eştî. O çax ke Rayberê ma reyde pêvînayîşê krîtîkî ameyî kerdene Qirkerdişê Parisî ame kerdene. Bi nê qirkerdişî ame waştene ke prosesê çareserîya sîyasî bêro sabotekerdene.

Raybertîye seba embaze Sara vatêne 'Têkoşînê Sara têkoşînê min o.' Rayberê ma 'Qirkerdişê Parisî' ser o vat ke nê qirkerdişî vera şarê Dêrsimî qirkerdişêko diyîn o. Embaze Sara dêrsimij bîye û bi kulturê Dêrsimî bîye pîl. Beno ke mîsala tewr ganî ya nê kulturê xoverdayîşî bîye. Şexsê embaze Sara de xîret amekerdene ke cinîyanê azadan û xoverdayoxan ro derbêke bêra dayene. Dewlete waştêne hem Rayberîye rê hem zî têgêrayîşî rê derbêke piroda. Coka no hêriş hetê dişmenî ra bi hawayêkê hîra ame hesabkerdene.

Embaze Rojbîne astêka girînge de karê komelkî û dîplomatîkî kerdêne. Rojbîne bi tewir, tewrbîyayîşê xo ameyêne naskerdene. Nê esasî ser o têkoşînêko raşt kerd. Embaze Ronahî embazêka ciwane bîye, bi coşêkê pîlî yê ruhê şorişî warê ciwanan de xebitîyayêne. Embaze Ronahî bi tewirê xo rayberîya şorişgêran ê ciwanan kerdêne.

Embaze Sara bi cuye, têkoşînê xo seba ma sembolê cuya azade ya. Raştîya aye seba ma krîterê xoverdayîşî û têkoşînî yo. Bi nê hêrişê namerdî embaze Sara hetê fîzîkî ra ma reyde nîya labelê bi hezaran Sarai Ronahî û Rojbîne vejîyayî meydan. Bi hezaran mîlîtanî rayîrê înan ser o şinê. Her şehadetî ra dima hêrsê ma, têkoşînê ma beno zêde. Ma têgêrayîşêko winasên ê ke bi nê erjan û estbîyayîşan estê. Dişmen çendek hêrişê ma keno wa bikero, xeta ma ya xoverdayîşî ya rêçê şehîdan ser o bena pîl û cewabê nê hêrişan yeno dayene. Se beno wa bibo ma do vera nê hêrişan xo ver bidê û rêçê şehîdan ser o şorê. Bi nameyê gerîlayanê YJA-Starî cewabê ma her tim do pîlkerdişê xoverdayîş û têkoşînî bo. Bi tewirêkê xurtî û bi ruhêkê fedayî ma do beşdarê têkoşînî bibê, qesasê şehîdanê xo bigêrê û bi xurtkerdişê xoverdayîşî ser bikewê."