Endama Meclîsê PAJKî Koçerîne Amed serra 2019î hetê cinîyan ra ercnaye û bale ante karakterê serra 2020î ser. Seba serra 2020î zî Amede destpêk de vat ke a hêvî kena ke serra newîye biba serrêka azadîye û serra newîya pêro cinîyan fîraz kerde.

Amede ANFyî reyde qisey kerd û pare kerd ke seserra 21. do bi têkoşînê azadîye yê cinîyan eşker biba. Amede vat: "Têkoşînê femînîstî ra zêdêr ma mîyanê pêlêka newîye ya têkoşînî de yê ke têna bi têkoşînê heq û azadîye nêeşkena bêra sînorkerdene. Têkoşînê azadîye yê cinîyan potensîyelê newe ra awankerdişê têkoşînanê komelkîyan ra vejîya meydan.

Kurdîstano ke bi xoverdayîşê rojeyê mergî yo ke rayberîya Leyla Guven de dest pêkerd, seba çinkerdişê tecrîdê Rayber Ocalanî moralêko pîl bi. Nê prosesî de rayberîya dadîyanê kurdan, cinîyanê kurdan zaf çalakîyî ameyî kerdene ke dewlete viste mîyanê panîkî. Bi tesîrê çalakîya grevê vêşanîye û çalakîyanê 8ê adare û 21ê adare weçînayîşê herêmî yê 31ê adare ame kerdene. Weçînayîş zaf hetan ra eşkeno bêro ercnayene labelê çîyêko taybet no yo ke weçînayîş wextêk de ke faşîzmê AKP-MHPyî yê vera kurdan polîtîkaya teslîmîyete dayêne kerdene coka weçînayîş vurîya bi sey referandum.

15 şaredarîyê ke hêzanê sîyasetê demokratîkî vistibi dest înan ra ameyî girewtene. Tirkîya de vera kurdan polîtîkaya şerî yena xebitnayene, weçînayîşan ra dima şaredarîyî ameyî xespkerdene û îşxalkerdene. Nê hêrişî hema zî dewam kenê. Nê weçînayîşî de eşkera bi ke awankerdişê hişmendîya welatperwerîye û cuya azade de rolê cinîyan pîl ê.  Dewlete seba ke sîstemê nikayînî bida dewamkerdene her roje plananê neweyan kena, hesabanê neweyan kena. Naye ra ganî cinîyî hînî hîna zêde fam bikê, muneqeşa bikê û xo rêxistin bikê.

Şerê Dinya yo 3. to ke Rojhelatê Mîyanênî de qewimîyeno serra newîye de zî do dewam bikê. Şer de vera cinîyan qirkerdişî yenê kerdene. Naye ra xopawitişî her çi ra ver yeno. Sere de Vakurê Kurdîstanî de ganî cinîyî her ca de xopawitişê xo bîyarê ca. Seba xopawitişî zî rêxistinbîyayîş û zanayîş hewcedar ê. Bê înan xoverdayîşê vera hêrişan nêbeno. Serra 2020î de zî nê hêrişê dişmenîye yê vera cinîyan û kurdan do dewam bikê. Serra newîye de ganî xoverdayîş her aste de bêro rêxistinkerdene, warê sîyasetê demokratîkî ra heta zîndanan û warê komelî  her ca û kar de ganî cinîyê ciwanî firsendanê tewr qijan zî biercnê û tewirêkê winasênî bimojnê ke dişmenî bêrê çinkerdene. Koyî xo ra ney kenê. Nê esasen ser o ma do bi hesretê pîlî seba Rayberê xo bixebitê û serra 2020î bivurnê serra serkewtişî û tewrê xeta azadîya cinîyan bibê."