Endama Rayberdişî ya KJK’yî derheqê 8 Adar a Roja Cinîyan ê Dinya de vat ke “Ez roja 8’ê Adare sere de heme afernayoxanê cuya azade, cinîyan ê xoverdayoxan û Rayberîya merdimîye rê pîroz kena. Ez xusûsen ro xoverdayoxanê ke seba rijnayîşê tecrîdê serê Rayber Apoyî mîyanê xoverdayîşî de yê pîroz kena. Çalakî û mucadeleyê înan de înan heminan rê serkewtiş wazena.”

Endama KJK’yî Ayten Amede qiseykerdişê xo wina domna “Roja 8’ê Adare netîceyê mucadeleyêkê bêhempayî yê bi serkêşîya Rosa Luksembûrge bica ame. A roje ra heta ewro na roje sey Roja Cinîyan a Dinya yena qebûlkerdene. Netîceyê bedelanê giranan de na roje virazîyaya. 1020 cinîyî yê mucadelekarî yê karkerî seba ke heqanê xo yê seypîyeye û azadîye bi dest bifînê, çalakî dabî destpêkerdene. Hişmendîya camêrdanê serdestan û sermayeperwere û seba ken ê heqan nêdê nê 1020 cinîyan ê karkeran fabrîkaye de vêşnayî. Hişmendîya ke cinîyî vêşnayî ewro serê hemeyê cinîyan de yena rayraberdene. Nê hêrişî sey qirkerdiş, pêşkarbîyayîş, nêdayîşê heqan û nênaskerdişî ewro zî dewam kenê. Ser de zî kesêk sey Suleyman Soyluyî yarîyanê xo bi cinîyan keno, nê heme heman hişmendîye ra yenê. Mabênê hişmendîya se û pancas serrî verî û ya ewroyêne ya dewletanê faşîst û kolonyalîstan de tu cîyayî çinêya. Nameyê înan bivurîyo zî fehmê înan yew o.”

XOVERDAYÎŞÊ CINÎYAN ÎQTÎDARÎ BIN FÎNENO

Amede vatişê xo wina domnayî “Nê rojanê peyênan de çapemenîya Tirkîya hemverê cinîyan de vatişanê çetinan vana. Merdim eşkeno vajo ke no hal maneno hişmendîya se û pancas serrî verî ke cinîyî vêşnabî. Hetê dewleta Tirkî, DAÎŞ’î û netewe-dewletan ra heman fehm ewro zî yeno domnayene. Hêrişê hemverê cinîyan çarçewaya xo serê zihnîyetê camêrd-serdestî de ronaya û bi nê hawayî zî dewam kenê. Ma cinîyî aîdê kamcîn netewe, sînor, welat, erd û bawerîyê benê wa bibê, ganî ma heq, azadî û seypêyîye rê wayîr vejîyê.”

“ZÎLAN Û SEMA CEWABÊKO XURT DA FAŞÎZMΔ

Amede vat: Şorişgêrê sey Zîlane û Semayan hemverê hişmendîya camêrdê serdestî de serre wedart û bi çalakîyanê xo cewabêko zaf pîl da hêzanê îşxalkaran û yê faşîstan. Ganî ma heme cinîyî dest bidê yewbînan û hemverê îşxalkarîye de hêzê xo yê mucadeleyî xurt bikerê ke ma roja 8’ê Adare biresnê manaya ci ya rasteqîne. Seba ma lazimîye esta ke ma xo biresnê tîtikê azadîye.”

Amede peynîya qiseykerdişê xo de vat: “Vengdayîşê mi seba heme cinîyan ê dinya û xusûsen zî seba cinîyan ê Kurdan no yo ke ganî rojan bikerê rojanê xoverdayîşî, ganî cinîyî bi xoverdayîşê Leyla Guvene û ruhê Şêladizê 8’ê Adare de hemverê kolonyalîzmî de vejîyê meydanan.”