Başûrê Kurdîstanî de goreyê Rêxistina Têkoşînê Vera Şîdetê Serê Cinîyan 9 mengan de tewr tay 35 cinîyî ameyî kiştene, 57 cinîyan o kişt û 207 cinîyî ameyî vêşnayene û xo vêşna. Bîlançoya pêro mengan hema zî nêameye destvistene.

La xebera kiştişê peyênî ya cinîyan Hewlêrî ra ameye. Roja 28ê kanûne de goreyê xebera çapemenîya herêmîye bajarekê Rizgarî ya qezaya Xebatî ya Hewlêrî de camêrdêk cinîya o qetil kerde. Kiştox ame destbendkerdene û derheqê serebûtî de tehqîqat ame akerdene.

Bitaybetî menga gulane seba cinîyan zaf trajedîk bîye. Mîyanê 10 rojanê peyênan ê na menge de Dihok, Hewlêr, Raperîn, Şengal, Dîyale û Kerkûk de 4 kênayê ke serrê înan 16 ra qijêr ê xo kişt.

Şîdetê camêrdan ra bi desan cinîyan muracatê merkezanê îltîcayî (Stirîn) kerd. Goreyê doneyanê Midurîyetê Pêroyî yê Karanê Komelkîyan ê Silêmanî mabênê 11 mengan de 191 cinîyî bi 45 domanan îltîcayê Keyeyê Îltîcayî yê Cinîyan ê Silêmanî kerd. Ame parekerdene ke nê cinîyan ra meselayê 166ê ci ameye çarekerdene û 25ê cinî zî hema zî keyeyê îltîcayî de yê.