Vizêr zî roja 39. de Rojhelatê Kurdîstanî û Îran de çalakîyanê ke qetilkerdişê Jîna ra dima dest pêkerdbî dewam kerd. Rejîmê Îranî sere de Seqiz de şaristananê Rojhelatî de leşker û hêzê xo cakerdî.

Roja 40. ya qetilkerdişê Jîna Emînî de ewro bi hezaran kesan gorê aye zîyaret kerd. Goristanê Ayçî yê şaristanê Seqizî yê Rojhelatê Kurdîstanî de rixmê teda û gefanê rejîmî zî merdiman bêmabên vat: ''Jin, Jiyan, Azadî.''

Kaykerdoxê futbolî Elî Daiyî zî gor zîyaret kerd û dima şi Otêla Kurdî ya Seqizî. Hêzanê Îranî dormeyê otêle girewt. Naye ser o mabênê ciwanan û hêzanê Îranî de alozîye vejîyaye.

Têna Seqiz nê xeylêk şaristananê Rojhelatê Kurdîstanî de seba roja 40. ya qetilkerdişê Jîna Emînî amadekarîyê yadkerdiş û çalakîyan yenê kerdene.

Şewbîne medyaya Îranî îdîa kerd ke keyeyê Jîna Emînî pare kerdo ke ê do yadkerdişêkî nêkerê. La keyeyî naye ser o eşkerayîye daye û na îdîa red kerde. Keye ewro do gorî zîyaret bikero.

Rêxistina Heqanê Merdiman a Îranî da zanayene ke serewedaritişê Îran û Rojhelatê Kurdîstanî de heta nika 234 kesî ameyê kiştene ke nînan ra 29ê ci domanê.