Endama Heyetê Îdareyî yê Komeleya Cinîyan a Rosa Esra Okur bi wesîleya 25ê Teşrîna Peyêne Roja Têkoşînê Vera Şîdetê Serê Cinîyan ANFyî rê qisey kerd.

Esra Okur îfade kerd ke ferasetê serdestîya camêrdan azadîya cinîyan ra terseno û wazeno şîdetî bikero parçeyê cuya rojane. Esra vat: ''Sere de cinîyê kurdî ganî pêro cinîyî vera ney têkoşîn bikerê. Vera nê ferasetî ma do her ca de cewab bidê. Cinîyî eke mîyanê têkoşînê rêxistinkerdeyî de cabigêrê têkoşînê ma do ser bikewo.''

Esra bale ante ser ke cinîyî raştê şîdet û hêrişê cînsîyî yenê û vat: ''Seba ke ma verê şîdet û hêrişan bigêrê ganî girîngîye bidê Roja Têkoşînê Vera Şîdetê Serê Cinîyan. Ma bi ruhê rêxistinbîyayeyî ganî waran de waştişanê xo bimojnê. Cinîyî do bi têkoşînê rêxistinbîyayeyî cuya azade awan bikerê. 

Ewro ma vînenê ke têkoşîno rêxistinbîyaye vera şîdetî tesîrêkê pîlî keno. Cinîyî do hertim waran de waştişanê xo bîyarê ziwanî. Coka ma sey Komeleya Rosa girîngîye danê çalakîyanê 25ê Teşrîna Peyêne. Ma venga pêro cinîyan danê ke tewrê nê çalakîyan bibê.''