Hemsereka HDPyî Pervîne Buldan tewrê kombîyayîşê Weçînayeyanê Cinîyan ê Îdareyanê Herêmanê Demokratîkan bîye û kombîyayîş de tay meselayan ser o qisey kerd.

Qiseykerdişê Buldane ra beşêk wina yo:

Qirkerdişê Parisî

"3 cinîyê kurdî Sakîne, Fîdane û Leyla paytextê Fransa Paris de verê çimanê pêro dinya de ameyî qetilkerdene. Nê cinîyî wexto ke Birêz Ocalan reyde pêvînayîşê prosesê çarserîye ameyêne kerdene ameyî qetilkerdene. No qirkerdiş vera haştîye, demokrasî û azadîye derbêka pîle bi.   Ma sey cinîyan awanbîyayîşê HEPî ra HADEPî ra bihêzî ameyî nê rojan. Cinîyan ê rojan ra dima xîret kerd ke hîna bihêzêr û bi pîlêr temsîlîyetê xo bikerê û nê xiretî bîyî wayîrê zaf destkewteyan.

Xespê Qeyûman

Ma weçînayîşanê 31ê adare de bi weçînayîşê hemşaredaran serkewtişêko pîl vist destî. La îqtîdarê AKPyî şaredarîyê ma xesp kerdî û hemşaredarê ma tepiştî. No zî mojneno ke no îqtîdar cin3iyan û xebata înan ra zaf terseno. Ma a partî ya ke bi xoverdayîş û têkoşîn benê zêde

AKP Kaos, Şer û Krîz Vrazeno

Ma vînenê ke AKP keno ke pêro krîzan bi pêkewtişan çare biko. Erdoganî vat ke 'Înan ez dawetê Lîbya û Sûrîye kerde û ez zî şîya.' Kamî ti dawet kerdî? Qaşo ti şîyî uca ke korîdorê haştîye abikî. La şima şîyî Rojawanî ke korîdorê haştîye çin bikê. Şîyayîşê şima yê uca Tirkîya rê hetê xo de kaos û krîz ard. Sere de krîzê ekonomîkî pêro xeletîyê ke şima kerdî bedelê înan şar dano. Şarê Tirkîya şer nêwazeno, cinîyî şer û pêkewtiş nêwazenê.AKP do şîdetê xo yê vera cinîyan û ma nêqedîno. Ganî ma vera nê şîdetî hîna bihêz bibê. Ê dp dewam bikerê ke hêrişê ma bikerê la ma bi tewirê xo yê qerardarî xîret bikerê ke na seserre bikerê seserra cinîyan."