Wekîla Partîya Çep a Keske ya Îzmîrî derheqê Konferansê Cinîyan ê Partîya Çep a Keske de ANFyî rê qisey kerd.

Burcugule Çubuk ard ziwan ke cinîyî bi taybetî îqtîdarê camêrdan ra mîyanê rêxistinîye de rehet nîyê. Burcugule Çubuk bale ante ser ke yeno xîret kenê ke warê cinîyan bêrê tengkerdene û coka seba ke cinîyan de bêrê yewca ê zehmetîye ancenê. Burcugule vat: ''Na noqta de ma armanc kenê ke rêxistinîya cinîyan xurt bikerê. Xora merdim eşkeno ney beşdarîya konferansê ma de zî bivîno. Xeylêk cinîyî wazenê heqê qiseykerdişî bigêrê, qiseyê xo vajê û nîqaş bikerê. Na rewşe serranê verênan ra cîya ya.''

Burcugule da zanayene ke îqtîdarê AKP-MHPyî reyde Tirkîya û Kurdîstanî de meseleyê cinîyan resayê asta tewr cidîye û vat: ''Faşîzmî bi hawayêkê xurtêrî verê xo da cinîyan. Ma konferansê xo de babetê sey nafaqa, îşkence, teda, şîdet, tecrîd ûsnî ercnayî. Çend çîyî est ê ke ma dayî xo ver. Mîyanê partîye de ma do rêxistinîya xo xurtêr bikerê ke cinîyî hîna zaf tewrê xebatan bibê û ma do bikerê ke cinîyê astengdarî hîna zaf tewrê xebatan bibê.''