Cenazayê Yusra Derwêş, Leymane Siwêş û Tumayî yê ke netîceya hêrişê dewleta tirke de ameybî qetilkerdene, bi merasîmanê heybetînan ameyî definkerdene

Bi hezaran roniştoxê Herêma Cizîre seba definkerdişê cenazaya Hemsereka Meclîsê Kantonê Qamişloyî Yusra Derwêş û Hetkara Hemserekîya Kantonê Qamişloyî Leymane Şiwêş (Rihane Amûdê)  Goristanê Şehîd Îsmaîlî yê Amûdê de ameyî pêser. Temsîlkarê Îdareyê Xoserî, Kongreya Starî, TEV-DEM û keyeyê şehîdan zî tewrê merasîmî bîyî. 

Merasîm de Hemsereka Meclîsê Keyeyanê Şehîdan ê Qamişloyî Hêvîye El-Seyd qisey kerd û ard ziwan ke dewleta tirke seba ke hêzê înan ra tersena dewleta tirke cinîyan ê serkêşan hedef kena.

Hemserekê Meclîsê Îdareyê Xoserî yê Herêma Cizîre Telet Yûnisî îfade kerd ke Erdogan wazeno ke pê nê hêrişan projeyê demokratîkî çin bikero û şaran bê îradeyî bikero. Yûnisî bêvengîya vera hêrişan şermezar kerde û vat ke ê do heta peynî rêçê şehîdan de şorê. 

Endama Koordînasyonê Kongreya Starî Rûkene Ehmed, keyeyê Yûsra Derwêş  û Hemserekê Partîya Yewîya Sûrîye Senherîb Bersûmî zî ard ziwan ke wird cinîyê şehîdî hînî sembolê cinîyan ê kurdan ê û qetî têkoşînê înan ser bikewê.

Dima ke şehadetnameyê Yusra Derwêş û Leymane Şiwêş ameyî dayene keyeyê înan, cenazayî ameyî definkerdene.

Seba Firat Tumayî zî bi beşdarîya temsîlkaranê dezgehanê sûryan û keldanan, temsîlkaranê Îdareyê Xoserî û Meclîsê Keyeyanê Şehîdan merasîmêk ame kerdene.

Cenazaya Tumayî hetê endamanê Komeleya Kulturî ya Suryanan ra ameye berdene bi Dêrê Mar Yaqub El Nesîbînî. Ayînî ra dima cenaza Goristanê Keldanan de ameye definkerdene. 

Hemsereka Partîya Yewîya Sûryanan Nazîre Gewrîye, Hemsereka Meclîsê Rayberdişî yê Îdareyê Xoserî Vîvîyane Beho Osê merasîmê definkerdişî de qisey kerd û ard ziwan ke diima ke Îdareyê Xoserî bire daye ke cerganê DAÎŞî muhakeme bikero dewleta tirke hêrişê xo yê vera Rojawanî zêdînayê. Qiseykerdişan dde venga pêro hêzanê garantoran da ke wa bikerê ke dewleta tirke goreyê adirbirnayîşî têbigêra.