Kiras û fîstanê ke wextêk kincê rojaneyî yê cinîyan ê kurdan bîyê, hînî teyna hetê cinîyan ê kokiman ra yenê tercîhkerdene. Cinîyê ciwanî teyna rojanê taybetan de nê kincan xo rê kenê.

Krîzo ekonomîk tesîrê kiras-fîstane zî kenê. Colemêrg de vaya nînan hezar û 500 ra heta 5 hezar bîye. 

Gulşene Îhtîyatogluya ke Colemêrg de bi serran o kiras û fistanan derzena û wina debara xo kena qala karê xo kerde. Gulşene ard ziwan ke muşterîyî modelêkî weçînenê, goreyê modelî a kincan derzena. Gulşene vat: ''Qasê 7 serrî yo ez nê karî kena. Emser krîzî ra veyveyî kêm bîyî coka karê ma zî kêm bîyî. Hem qumaş vay o hem zî ma zî neçare manenê ke vayî ra bidersê. Vayê ceyran, awe û kira zêdîyenê coka ma zî vaya deştişî zêdînenê.''

Gulşene îfade kerd ke ê kiras û fistananê herêma Colemêrgî derzenê û vat: ''Kiras û fîstanê ma rengîn û xemilnaye yê. Verê cû Colemêrg de kincê veyvan zaf xemilnaye bîyî, sipî nêbîyî. Kincê rengînî kulturê tradîsyonî yê kurdan ê. Ganî ma wayîrê nê kulturî vejîyê. Cinîyê kurdî qetî kincanê xo ra fek vera nêdanê. Bi taybetî veyveyan de kiras û fîstanan xo rê kenê.''