Platformê Cinîyan ê Dêrsimî, çarçewaya programê 8’ê Adare de, bi sernuşteyê “Vera Krîz, Kolonyalîzm, Şîdetî de Cinîyî û Mucadeleyê ci” yew panel organize kerd. Panel awanîya Komeleya Elewîyan a Demokratîke de ame viraştene û xeylî cinîyî beşdarê ci bîyî. Duygu Kubane moderatorîya panelî kerde û parlamentera HDP’yî Muazzez Orhane, îdarekara Tum-Bel-Senî Sati Buruncu Çaliye û hiqûqnase Çagla Yolaşane sey qiseykerdoxan panel de ca girewt.

DO MUCADELE DEWAM BIKERO

Panel de verî hiqûqnase Çagla Yolaşane qisey kerd û derheqê şîdetê vera cinîyan û derheqê qanûnê ceza de malumatî dayî. Yolaşane va cinîyî bi mucadele bîyî wayîrê destkewteyan û ganî seba pawitişê nê heqanê xo zî mucadele bikê. Çagla Yolaşane wina dewam kerd: “Qanûnê ke Tirkîya de ameyê qebulkerdene, bi mucadeleyê cinîyan ameyê ser. La ganî cinîyî, seba ke nê destkewteyanê xo bipawê, xo ver bidê. Ma yew çol de sîya yew dare ra negêrê, ganî yew daristanî zergun bikerê. Ganî bi nê qanûnan mevindê û seba hîna zêde destkewteyan mucadele bikê.”

SEBA SESERRA NEWEYE MA AMADEKARÎYA ÎDAREYÊ HERÊMÎYÎ VÎNENÊ

Parlamentera HDP’yî Muazzez Orhane zî wina qisey kerd: ”Cinîyî 160 serrî yo ke mucadele kenê û 20 serranê peyênan de, bi mucadeleyê azadîye yê cinîyan ê Kurdan, no mucadele hîna bîyo berz û aver şîyo. Bi sîstemê hemserekîye, cinîyan her hetê cuye de ca girewt û bîyî wayîrê îradeyî. Xelî destkewteyê cîniyan ê Kurdan estê. Ma seba ke seserra 21’î bikerê seserra cinîyan xebetînê û amadekarîya xo kenê. Ma do şaredarîyê ma yê ke ameyê îşxalkerdene peyser bigîrê û berê cuya azade û seyyewbînîye akerê.”

GANÎ MA VAJÊ MA DO SER BIKEWÊ

Sati Buruncu Çaliye zî wina qisey kerd: ”Ma cinîyî, seyyewbînîye, haştîye û demokrasîyî wazenê. Ma 365 rojanê serre bi mucadele derbaz kenê. Ganî ma vajê ma estê û ma do bivurnê, ma do ser bikewê. Kes bi heqê kesî kay nêkero. Vanê ‘ma prosesêkê winasîyî de yê’ û bi keda cinîyan kay kenê, kenê ke krîz de cinîyî mevejîyê teber. Nika wextê weçînayîşî yo û krîz rîyê xo hîna baş musneno. Seba ke talebê  înan nêameyê ca, xeylî kesî kewtê grevê vêşanîye.”

Panel bi pers û cewaban ame qedênayene.