Çeteyanê DAÎŞ’î gama ke 3’ê Tebax a 2014’î de hêrişê bajarê Şengalî yê Başûrê Kurdistanî kerd bi hezaran doman, cinî û merdimê sivîlî qetil kerdî. Bi hezaran cinîyê Êzidîyî hetê çeteyan ra ameyî remnayene û dereceya koleyanê cinsîyan de îşkence înan rê ame kerdene û ameyî kiştene. Bi des hezaran cinîyê Êzidîyî ke qirkerdişêko tewr pîl ê seserra 21’ine hemverê înan de ame kerdene hetê şerwananê YPG/YPJ û gerîlayanê HPG’yî ra bi korîdora merdimîye ameyî xelesnayene.

Bi wesîleya serrgêra 5’ine ya nê hêrişan ke sey qirkerdiş yenê dîyene Federasyonê Meclîsê Cinîyan ê Êzidîyan ê Almanya 3’ê Tebaxe sey roja çalakîyan a hemverê Femînîsîdî îlan kerd. Hemverê Femînîsîdî ke tena seba ke cinî yê yenê kiştene, veng dîya heme cinîyan ke temamê dinya de vejîyê meydanan. Ame pêhesnayene ke çalakî û numayîşê 3’ê Tebaxe do bale biancê sere Şengalî.

Bi serkêşîya federasyonî do 3’ê Tebaxe saete 11 de seba vîrardişê cinîyanê ke hetê çeteyanê DAÎŞ’î ra Şengal de ameyê qetilkerdene û ameyê remnayene aktîvîteya deqeyêk hurmetgirewtişî bêro kerdene.

Federasyonî da zanayene ke Femînîsîd bi destê çeteyanê DAÎŞ’î ame kerdene û vist vîrî ke cinîyê Êzidîyî yê ke 3’ê Tebax a 2014 de ameyê remnayene, bazarê koleyan de ameyê rotene û pêşkarê înan bîyê û her tewir kerdişê teberê merdimîye înan ser o ameyo bicaardene.