Cinîyan ê Êzidîyan û xoverdayoxan 8'ê Adare pîya pîroz kerd

Cinîyê Êzidîyî, seba ke paştdarîye bidê xoverdayîşê vera tecrîdî, yew hewte yo ke verê Konseya Ewropa de kewtîbî grevê vêşanîye. Cinîyê Êzidîyî bi wesîleya 8’ê Adare, çalakwananê grevê vêşanîye yê bêwext û bêdore de ameyî têhet û çalakîya xo qedênaye.

Seba ke paştdarîye bidê çalakîyanê grevanê vêşanîye, verê bananê Konseya Ewropa û Komîteya Vernîgirewtişê Îşkenceyî yê Strasbourgî de çalakîyê grevê vêşanîye yê 5 rojinî ameybî viraştene. Çalakîye 25’ê Sibate de, hetê endamanê PYD’yî ra ameybî destpêkerdene û no hewte zî Sîwana Meclîsê Cinîyan ê Êzîdîyan ra 7 cinîyan çalakîye dewr girewtebî.

Cinîyan ê Êzidîyan vizêrî şan de çalakîya xo qedênaye û şîyî zîyaretê cinîyan ê çalakîya grevê vêşanîye yê Strasbourgî. Cinîyan ê Êzîdîyan çalakwanî Dîlek Ocalane, Gulîstan Îke û Nurgûl Başarane ziyaret kerdî û çîta sipeye ya ke cinîyê Êzîdîyan erzenê xo ser sey dîyarîye daye xoverdayoxan. Cinîyan ê Êzîdîyan va ê do her ware û cayî de mucadeleyê xo bidomnê.

Cinîyan ê Êzidîyan qiseykerdişêk kerd û va “ma do heta peynîye şima het de bê û mucadele bikê.”

Nurgul Başarane zî bi nameyê cinîyan ê çalakwanan qisey kerd û wina va: “Emser bi xoverdayîşê cinîyan ê Kurdan barbarîya DAÎŞ’î ameye qedênayene û binkewtişê DAÎŞ’î rastê 8’ê Adare ame. No zî zaf bi mana yo. Cinîyê Êzidîyî vera tecrîdî mucadele kenê û xoverdayîş her ke şono beno pêt. No xoverdayîş do serkewtişî bîyaro.”