Dêrsim de bi wesîleya 8’ê Adare cinîyî Meydanê Seyîd Rizayî de ameyî pêser û bi coşekê girdî roja xo pîroz kerde. Cinîyan Guvene silam kerdî û vat ke ma vera zulê dewlet-camêrdî de milê xo çewt nêkenê.

Dêrsim de Nurşat Yeşîle ya pîya  namzedê şaredarîye bînî û temsîlkare  sazîyan zî tede xeylî cinîyî Meydanê Seyîd Rizayî de ameyî têhet û eşkerayîyêk daye. Bi nameyê platformî  Fatoş Yîgîte eşkerayîye wend.  Eşkerayîye de şexsê Leyla Guvene de xoverdayîşê grevê vêşanîye ame silamkerdene û bi sloganan bale anciya vera dîktatorîye de xoverdayîşê cinîyan ser. Cinîyan waşt ke waştişê xoverdayoxanê grevê vêşanîye bêrî ca. Ame vatene ke wextê îktîdarî de  zextê serê cinîyan zêdîyayo la cinîyî rixmê heme hêrişan vera dîktatorîye de çok nêdane û wayîr heqanê xo vejîyenê. Eşkerayîye ra dima cinîyan bi deyîran û govendan roja xo pîroz kerde.