Konferansê Platformê Yewîya Cinîyan ê Kurdan 22ê kanûna 2019î de Demîr Otêlî yê Amedî de amebi serûberkerdene. Beyannameyê peynî yê konferansî bi eşkerayîyêk ame parekerdene.

Beyannameyê peynî yê konferansî de nê ameyî parekerdene: "Platformê Yewîya Cinîyan ê Kurdan serrgêra dîyîne ya awankerdişê xo de reyna dezgehanê kurdan, partîyanê sîyasîyan, înîsîyatîfanê cinîyanê kurdan û têgêrayîşê cinîyan reyde bi sloganê 'Ma tîya ra yê, ma tîya de yê, azadîya ma yewîya ma ya' ame têhet. Ma hêrişê vera Kurdîstanî, binpaykerdişê heqanê merdiman û dejê ke ameyî antene muneqeşe kerdî. Û ma resayî têna netîceyêkî: Heta ke sere de cinîyanê kurdan kurdî yew nêbê çar parçeyanê Kurdîstanî de qirkerdiş û polîtîkayê asîmîlasyonî do xelas nêbê.Çarenusê azadîya ma pêro parçeyanê Kurdîstanî de yewîye û azadîya kurdan o. Ma wazenê venga sîyasetmedaranê kurdan û şarê kurdî bidê. Ma sey cinîyan yewîya kurdan sey hêzêkê pîlî vînenê. Ma îdeolojîyanê fermîyan ê ke cinîyî seke ê çin ê hesibnenê, serdestîya camêrdan, feodalîzm û milîtarîzm qebul nêkenê. Seba azadîya kurdan bi waştişê yewîye ma vejenê verî. Ma pê bawer ê, ma do ci ra fek vera nêda. Ma reyna bi israrî veng danê ke yan ma do bibê yew yan zî ma yew bi yew çin bibê. Waştişo ke Eyşe Şan waşt Amed de bêra definkerdene ma sey cinîyan ê kurdan sey wasîyetêk hesibnenê û ma do israr bikê ke gorê Eyşe Şan qezaya Buca ya Îzmîrî ra bêra ardene bi Amedî. Konferansê ma yo diyîne bi vengdayîşê partîyan, înîsîyatîfan û têgêrayîşanê kurdan qedîya. Vengdayîşê ma yê cinîyan 'Ey kurdênê bibê yew. Eke ma nêbê yew ma do şorê yew bi yew.' ''