Endamê Platformê Cinîyan ê Dîcle (DAKP) û atkvîstanê Têgêrayîşê Cinîyan ê Azadan (TJA) vera operasyonanê qirkerdişî Parka Hazale ya semtê Ofîsî de eşkerayîye daye û hêrişê polîsanê tirkan ê vera Xanime Turk û keyeyê ci protesto kerd.

Eşkerayîye de bale ameye antene hêrişê îqtîdarî yê vera cinîyan ser û ame vatene ke rixmê heme tacîz, tecawuz û qirkerdişê  vera cinîyan, cinîyî vera polîtîkaya hêrişkare peyser game nêerzenê û têkoşînê xo pîlêr kenê. Cinîyan vist vîrî ke yaroje polîsanê ke pê kutikan eşt keyeyê Xanime Turk ser kutikî verdayî şarê keyeyî ke tede tutî zî estbî. Cinîyan vat: ''Polîsan Xanime girewte yew çime û kutik verda pa. Hela ke Xanime xo kutikî rê pawitêne polîsî qîrayî ser û vato mudaxaleyê kutikî mekerê. Qol û qorê Xanime hetê kutikî ra ameyî perçekerdene. No muameleyo teberê merdimîye vera huqûqî û heqanê merdiman o. Vera heqê cuya yo. Dîn, ziwan, bawerî, nasname û rengê ci çi beno wa bibo îşkenceyo winayên qet merdimêkî rê nîno qebulkerdene. Ma do gerreyê polîsanê hêişkaran bikerê.''