Madenê  Zerrnî yo ke dewa Mursalî ya qezaya Dîvrîgî de do bêro viraştene nika ra zirar dano xoza.

 “MURSAL SEY POLÎTÎKAYA DEWLETE BI ZANAYÎŞ AME WEÇÎNITINE ”

Cennet Şîmşeka ke îdarekaranê Komela Kulturî ya Dîvrîgî ra ya seva reaksîyonê xo yê hemverê madenî bîyaro ziwan Stenbol ra amîya Mursal. Şîmşeke ard ziwan ke zerrno sîyanurin zirar dano merdiman, herrî û awe û vat: “Çi heyf ke ma ameyî mecbûrkerdene wareyê xo ca verdê. Ma dejê nê Stenbol de ancenê. La ez seva wareyê xo û merdimanê wareyê xo çîyanê rindan wazena û hem zî seva ke hemverê polîtîya dewlete ya yena û ez do reyna zî bêrî tîya.”

“HÊZÊ CINÎYAN DO ZORÊ MADENKARAN BERO”

Şîmşeke vat cinîyî heta peynî do hemverê nê madenî vejîyê û musade nêkerê ke zerrno sîyanurin bêro vetene û vat hêzê cinîyan do zorê madekaran bero.

“MA HET DE SÎYANUR LAYÎQÊ ŞARÊ MURSALÎ NÊYO”

Komela Kulturî ya Dîvrîgî ra yewna cinî zî vat ke a zî seva ke vengê xo hemverê madenê zerrnî de vejo Stenbol ra amîya Mursel. Cinî ard ziwan ke sîyanur layîqê şarê Mursalî nêyo û no qedênayîşê Mursalî yo.

“MA BI ZENGÎNBÎYAYÎŞ NÊWAZENÊ BIMIRÊ”

Vernamzeda şaredarîya Dîvrîgî Adalet Încîye zî vat ke aye hemverê zerrnê sîyanurinî de ya û na yewe ra amîya çalakî. Încîye vat hendeyê Mursalî maden do Dîvrîgî ser o zî tesîrêkê xirabî bikero û vat ma bi zengînbîyayîş nêwazenê bimirê.

 “SEVA KARÊ XO DO MA BIKIŞÊ”

Cinîyanê bînan ê ke tewrê çalakî bîyî vat viraştişê madenî do sere de merdiman, xoza, herrî, heywanî, rez û baxçe zî tede cuya înan rê zirar bido û waşt ke no maden nêro viraştene. Cinîyan vat ê seva karê xo weşîya ma erzenê tehluke û do ma hêdî hêdî bikişê.