Endamanê Platformê Cinîyan ê Îzmîrî bi çalakîyêke paştî daye Hemsereka HDPyî ya Îzmîrî Berna Çelîk ke 9ê teşrîna verêne ameye tepiştene û dekewtişê zîndanî de raştê cigêrayîşê rûtî ameye.

Eşkerayîya ke hetê endama platformî Rûkene Emekdar ra ameye kerdene de ame vatene ke cinîyî her ca de raştê hêrişî yenê. Eşkerayîye de pêkewtişê mabênê Îsraîl û Fîlîstînî ameyî vîrvistene û wina ame vatene: " Ma veng danê ka wa pêro cînîyî paştî bidê cinîyan fîlîstînijan. Îqtîdaro faşîsto ke polîtîkaya şerî rayra beno wa ma rê qala heqanê merdiman mekero. Hemraya ma Hemsereka HDPyî ya Îzmîrî Berna Çelîk  a ke 9ê teşrîna verêne ameye tepiştene, dekewtişê zîndanî de raştê cigêrayîşê rûtî ameye. Pereyo ke dîyeno şerî wa semedê cinîyan rê bêrê xerckerdene. Wa verê sîyasetê demokratîkî bêro akerdene ke meseleya kurdan bêro çareserkerdene. Wa pêkerdişê bi Îsraîlî bêrê betalkerdene û Îsraîl hera ke îşxal kerde ra wa xo peyser bianco ke şarî qederê xo tayîn bikerê."