Cinîyê ke vîrusê Korona ra keye de manenê rastê şîdet û îstîsmarê camêrdan manenê. Başûrê Kurdîstanî de no rêj zêde yo. Yeno vatene ke kesê ke nê wextî de cinîyî kiştî û ê îstîsmar kerdî ameyî efûkerdene û mîyanê komelî de têgêrenê.

Hewlêr de vera domana 7 serre  û bajarekê Pirdî yê Kerkûkî de zî hetê endamanê Haşdî Şabîyî û polîsanê Iraqî vera cinîyêka astengdare îstîsmaro cînsî ame kerdene. Vera nê serebûtanê îstîsmarî nêrazbîyayîşî zêdîyenê.

Rêxistina Cinîyan ê Ciwanan ê Têkoşeran zî derheqê babete de eşkerayîyêke weşanaye û serebûtî şermezar kerdî. Eşkerayîya rêxistine de nê çîyî ameyî vatene:

''Ma do vera hîşmendî û mezgê cinîkiştoxî û îstîsmarê cînsîyî têkoşînê xo pîl bikerê. Nê têkoşînî de ma do qet nêvinderê. Vengdayîşê ma o yo ke wa cinîyî û cinîyê ciwanî vera hîşmendîya cinîkiştoxe û îstîsmarî rêxistina xo pîlêr bikerê. Xo rêxistin bikerê. Vera hêrişan xo bipawê. Eke ma xo nêpawê çew ma nêpaweno.''