Partîya Çep a Keske bi beşdarîya namzeda xo ya wekîlîye Aytene Kordu Dêrsim de xebatanê weçînayîşî rê bêmabên dewam kena. Namzede Aytene Kordu dewe bi dewe, keye bi keye gêrena û şarî zîyaret kena.  

Cinîyanê Dêrsimî derheqê zîyaretan û waştişanê xo yê weçînayîşî de Ajansê Mezopotamya rê qisey kerd.

Fecîde Aldemîr pare kerd ke ê binê tesîrê krîzê ekonomîkî de mendê û vat: ''Wa Erdogan şoro. Xêrî ser o ma ey ra xelisîyenê. Partîya Çep a Keske do her çî bivurna, ma pê aye bawer ê. Ma pîya do nê îqtîdarî bişawê.''

 Elîfe Yildiz ard ziwan ke şar hînî îqtîdarî ra aciz bîyo û vat: ''Ez do raya xo bida Partîya Çep a Keske. Ma do pîya nê îqtîdarî bivurnê. Seba ke ma Erdoganî bin bivisnê raya xo bidê  Kiliçdarogluyî. Bi serran o seba ke nameyê Dêrsimî apey bêro dayene ma têkoşîn kenê. Naye ra Partîya Çep a Keske hêvîya ma ya.''

Hanime Eker bale ante ser ke îqtîdarê AKP-MHPyî şar visto mîyanê xizanîye û vat: ''Kira zî tede her çî zaf vay ê. Eke şarê ma destî bido destî, xora no do biqedo û îqtîdar do şoro.''

Songule Yilmaz eşkera kerd ke a do raya xo bida Partîya Çep a Keske û vurîyayîşî bîyarê. Songule Yilmaz vat: ''Partîya Çep a Keske û Kiliçdaroglu do sîstemî bivurnê.''