Platformê Cinîyan ê Dêrsimî çarçeweya 25ê Teşrîna Peyêne Roja Têkoşînê Vera Şîdetê Serê Cinîyan de bi şîarê, Vera feqîrîye , şîdet û şerî têkoşîno rêxistinkerde Kuçeyê Hunerî ra ver bi Meydanê Seyîd Rizayî rayra şîyî.

Cinîyan Meydanê Seyîd Rizayî de eşkerayîye daye. Eşkerayîye hetê Endama Platformê Cinîyan ê Dêrsimî Fatoşe Taşkale ra ameye wendene. Fatoşe Taşkale bale ante hêrişanê vera cinîyan ser ke wextê îqtîdarê AKPyî de bi hewayêkê sîstemakî yenê kerdene û nê vatî: ''Îqtîdar doneyanê şîdetê camêrdan eşkera nêkeno.  10 menganê verênan ê 2023yî de 353 cinîyî ameyî qetilkerdene. Cinîyî her roje bi hewayêkê sîstematîkî raştê tacîz, îstîsmar û her qeyde şîdetî yenê.  Îqtîdarê faşîstî bi bedilnayîşê qanûnê bingeyî îlan kerd ke do şîdetê vera cinîyan bêro domnayene.  Sere de wendekarê unîversîte cinîyî bajar de raştê şîdet, tacîz, îstîsmarê sîstematîkî yenê.  Netîceya polîtîkayanê leyminan de Gulîstane Doku 5ê çeleyê 2020 de ameye qetilkerdene ke hema zî qetilkarî nêameyî cezkakerdene. Ma tîya ra reyna veng danê ke wa qetilkarî bêrê cezakerdene.''

Wekîla HEDEPî ya Dêrsimî Aytene Kordu zî nê vatî: ''Ma gama ke vanê têkoşîno rêxistinkerde ma çîyêkê muhîmî nîşan danê. Ma vanê wa biciwîyo têkoşînê ma yo rêxistinkerde.  Ma do têkoşînê xo cewabê faşîzmê rejîmê AKP-MHPyî bidê. Ma do sey cinîyan ê azadan bi têkoşînê xo yê rêxistinkerdeyî komelê demokratîkî înşa bikerê.  Heta ke ma azad mebê, ma nêeşkenê seycîyeyîye bîyarê. Ma cinîyî do bibê serkêşê azadkerdişî. Tarîxêko qedîm ê Dêrsimî est o.  Ma zanê kam rayîrê ma roşn keno, o tarîxê xoverdayîşî yo, Ma Zarîfeyan, Sakîneyan, Aysel Doganan û Arine Mirkanan ra yenê. Ma her ca de yê, ma do her ca de bê. Ma bi felsefeya Jin jiyan Azadî rayra şinê.''

Badê qiseykerdişan Songule Bulur eserê xo yo ke sememdê cinîyan nuşte vat. Dima ra Grûba Erbane ya Meclîsê Cinîyan ê SESî erbaneyî kuwayî û deyîrî vatî.