Vervatox û hemserekê rêxistinanê cinîyan ê Kurdan ê ke welatanê Îskandînavya de xebatan ramenê, seba ke rêxistinbîyayîşê xo xurt bikerê û perwerdeyê xo bivirazê, peynîya hewteyî de bajarê Uppsala yê Swêdî de ameyî têhet.

Rêxistinanê çar parçeyanê Kurdistanî ra 35 cinîyî tewrê çalakîye bîyî. Cigêrayoxe Sûltan Ogere kombîyayîşî de qisye kerd û ard ziwan, seba ke cinîyî bieşkayê zêdetir wayîrê keda xo bibê hewcedarîya bi perwerdeyî esta. Ogere vat, “Ma hem cinî yê hem zî koçber ê. Ma welatanê xo de nêciwîyenê û ganî ma hewcedarîyanê xo tespît bikerê. Cinîyê Kurdan ê ke mecbûr koçê Ewropa kerdo, persanê cîyayan ciwîyenê. Sere de zî tesîrê cuya ke welatêko bîn de bi kulturêkê cîyayî yena ciwîyayene.” Kombîyayîş de rewşa Tirkîya, Kurdistanî û Rojawanî ameyî ercnayene û têkoşînê cinîyan ameyî munaqeşekerdene. Cinîyan bale ante serê grevê vêşanîye û rojeyê mergî yê vera tecrîdkerdişê Ocalanî û qerar da ke hewte çalakîyan bikerê.