Çarçewa Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' de şaristanê Dusseldorfî yê Almanya de forumê bi nameyê 'Azadîye do ser bikewa' ame serûberkerdene. 

Xeylêk cayanê Ewropa ra tewr tay 300 cinîyî tewrê forumî bîyî. Reyna rêxistinê cinîyan ê kurdan ê sey KJAR, TEKO-JIN, FEDA û êzidîyan zî tewrê forumî bîyî.

Roniştişê verênî de Gulîstane Îke moderatorîye kerde û nameyê TJK-E ser o Gonule Kaya qisey kerd. Kaya da zanayene ke tecrîd teyna vera Rayberê Şarê Kurdî Abdullah Ocalanî ney vera têkoşînê azadîya cinîyan zî yeno caardene.

Buroyê Huqûqî yê Asrinî ra Razîye Ozturk zî ard ziwan ke tecrîdo ke 25 serrî yo yeno kerdene huqûqî binpay keno. 

Roniştişê diyînî de xeylêk dezgehanê ke paştî daye hemleya azadîye qisey kerd. Meclîsê Cinîyan ê Êzidîyan, dezgehanê cinîyan ê kurdan, Yewîya Cinîyan ê Elewîyan ê Demokratîkan ûsn. roniştişê diyînî de ercnayîşî kerdî û vat ke ê do seba azadîya Rayberê Şarê Kurdî bi pêro hêzê xo têkoşîn bikerê.

Dima netîcenameyê forumî ame wendene. Wextê wendişê netîcenameyî de cinîyan sloganê "Bijî Serok Apo" û "Jin jiyan azadî" berz kerdî.

Netîcename de wina ame vatene: ''Sey cinîyan ma azadîya xo besteyê azadîya Rayber Apoyî vînenê. Pawitiş û caardişê kesayetê cinîya azade bi rijnayîşê beranê Îmraliyî mumkîn ê. Rojdemê ma yo verên şiknayîşê tecrîdî û azadkerdişê Rayber Apoyî yo.

Ma do sey têgêrayîşanê cinîyan ganî vera polîtîkayanê tecrîd, teda û qirkerdişî cade têbigêrê. Ma pê bawer ê ke pê paradîgmaya Rayber Apoyî nê polîtîkayan vindarnê. Ma bi pêro meclîs, komun û rêxistinîyanê xo tewrê Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' benê. Wext wextê azadîya Rayber Apoyî yo.

Naye ra pey zî ma do têkoşînê xo yê seba azadîya Rayber Apoyî û şorişê cinîyan pîl bikerê. Ma venga pêro têgêrayîşanê cinîyan danê ke tewrê hemleya ma bê.''