Paytextê Lubnanî Beyrut de hetê Komeleya Cuye ya Cinîyan, Komeleya Newroze û Înîsîyatîfê Nûnî yê Seba Azadîya Rayber Abdullah Ocalanî ra bi şîarê 'Serê Rêçê Jin Jiyan Azadî de' konferansê cinîyan yeno kerdene.

Tunus, Urdun, Iraq, Lubnan, Tirkîya, Filîstîn, Misir, Sûrîye, Îran, Şingal û Rojawanê Kurdîstanî ra 80 temsîlkarê dezgehanê cinîyan tewrê konferansî bîyî.

Vizêr roniştişê verênî yê konferansî de Sereka Komeleya Cinîye û Serkêşîye Sena Xanîme moderatorîye kerde û Dr. Marîye Dibis derheqê serhildananê ereban de tesîrê cinîyan de qisey kerd.

Sereka Komeleya Cuye ya Cinîyan Buşra Elî zî pare kerd ke polîtîkayê şerî û dewlete tewr zaf tesîrê cinîyan kenê û vat: ''Amed de bi destekê dewleta tirke waqayê şîdetê vera cinîyan zêdîyenê. Goreyê raporê 2019î 5 mengan de 838 cinîyî raştê şîdetê winayênî ameyê.''

Nameyê Cepheyê Xelisîyayîşê Cinîyan ê Misirî ser o Kerîme El Hefnaqî qisey kerd û vat ke Afrîka de her hîrê cinîyan ra yewa ci maruzê şîdetê fîzîkî, cînsî û psîkolojîkî yena.

Roniştişê diyînî de femînîste-aktîvîste Neslîhane Acar qisey kerd. Acare bale ante ser ke sîstemê hemserekîye sîyasetî demokratîkî kena. Acare ard ziwan ke fikrê azadîya cinîyan de rolê Rayberê Şarê Kurdî Abdullah Ocalanî zaf girîng o. 

Endama Komîteya Têkilîyanê Dîplomasî ya Têgêrayîşê Azadîye yê Cinîyan ê Êzidîyan (TAJÊ) Sihame Reşo qiseykerdişê xo de agahîyî dayî ke cinîyê şingalijî dima ke destê DAÎŞî ra yenê xelisnayene senî ciwîyenê.

Sereka Komîteya Têkilîyanê Teberî ya Komeleya Cinîya Azade ya Rojhelatê Kurdîstanî (KJAR) Rozerîne Kemanger bale ante serewedaritişê 'Jin, Jiyan, Azadî' yê Rojhelatê Kurdîstanî û Îranî ser û vat: ''Dewleta Îranî vatêne ke teyna komelî a îdare kena la nê serewedaritişî ra dima ma dî ke komel xo bi xo îdare keno.''

Konferans ewro do dewam bikero.