Verê roniştişê dewaya vera betalkerdişê Peymana Îstanbulî cinîyî rixmê astengîya polîsan zî verê Mehkemeya Îdarî ya Berze de ameyî pêser înan eşkerayîyêke daye. Vervatoxa Meclîsê Cinîyan ê HDPyî Ayşe Acar Başaran, Sereka TTByî Şebneme Korur Fîncanci, Platformê Seba Têdûştîye yê Cinîyan (EŞÎK), temsîlkarê KESK û TMMOBî zî tede xeylêk temsîlkarê partî, rêxistin û baroyan tewrê eşkerayîye bîyî

Wextê eşkerayîye de cinîyêke ameye destbendkerdene. Cinîyan vera provakasyonê polîsan nêrazîbîyayîşê xo mojna. 

Nameyê EŞÎKî ser o Tulîne Eraslane qisey kerd û vat: ''Ma tedaya îqtîdarî ya serê huqûqî dewaya cînayetê Pinare Gultekîn de dî. Ma seba ke edalet bêro caardene têkoşînî rê dewam bikerê.

Cinîyan ê aktîvîstan Nurhane Demîrtan û Înce Însesogut zî pare kerd ke ê do waran nêteriknê. 

 Sereka TTByî Şebneme Korur Fîncanci îfade kerd ke seba newe ra caardişê Peymana Îstanbulî cinîyî pîya têkoşîn kenê.

Sereka Platformê 'Ma Do Verê Kişîyayîşê Cinîyan Bigêrê' Gulsume Kav vat: ''Ma ameyê ke heq û cuya xo bipawê.'' Kave vera astengîya polîsan nêrazîbîyayîşê xo mojna. 

Aşye Acar Başarane vat: ''Her roje cinîyî yenê qirkerdene la dewlete herinda ke kiştoxan ceza bikera, cinîyan asteng kena. Ma sey HDPyî seba caardişê Peymana Îstanbulî têkoşînî rê dewam bikerê.''

CHPyî ra Alîne Nazliaka dîyar kerd ke ê wazenê ke peynîya na neheqîye bêra ardene. 

Eşkerayîye ra dima cinîyî derbazê salona roniştişî bîyî.