Sere de Dêrsim xeylêk şaristananê Vakurê Kurdîstanî de cinîyî vejîyayî waran û bi wesîleya 25ê Teşrîna Peyêne Roja Têkoşînê Vera Şîdetê Serê Cinîyan mesajê xoverdayîşî pare kerdî.

Dêrsim

Platformê Cinîyan ê Dêrsimî Kuçeyê Hunerî de eşkerayîye daye. Eşkerayîye de pankarta 'Wayanê Mirabalan ra heta Jîna Emînî têkoşînê ma dewam keno' ameye akerdene. Nameyê platformî ser o Hemsereka SESî ya Dêrsimî Serape Kahraman eşkerayîye wende û bale ante têkoşînê cinîyan ê vera qeyûman, kedwerdeyan, şer û teda. Serape Kahraman da zanayene ke Dêrsim de xeberê şîdetî pêser yenê û aqîbetê Gulîstane Doku pers kerd. Kahramane waştişê cinîyî ardî ziwan. Çalakîye bi sloganê “Jin jiyan azadî” qedîyaye.

Semsûr

Platformê Cinîyan ê Semsûrî Parka Demokrasî de eşkerayîye daye. Eşkerayîye de ame vatene ke cinîyî cuyêka azade û têdûşte wazenê, xoverdayîşê cinîyan her ke şino beno pîlêr û qirkerdişê Jîna Emînî ra dima zî serewedaritişê vera dîktatorîye dest pêkerdo.

Meletî

Platformê Cinîyan ê Meletî Parka Soydanî de pankarta 'Ma do cuyêka azad û têdûşte pîya awan bikerê' û dowîzê 'jin, jiyan, azadî' akerdî. Dima cinîyan eşkerayîya xo wende û vat ke ê do wayîrê tradîsyonê xoverdayîşî bivejîyê.

Dîlok

Platformê Cinîyan ê Demokratîkî yê Dîlokî waşt ke teber de eşkerayîyêke bido la qedexeyê walîtîye ra zere de eşkerayîya xo wende. Eşkerayîye de ame vatene ke ê do têkoşîn û xoverdayîşê cinîyan pîl bikerê.