Endama Meclîsê Dayîkanê Haştîye  yê Wanî Xemê Akdogan (85) a ke 15 rojî yo nêweşxane tedawî dîyene, 6ê temuze de bado ke servîsê ciewnîyayîşê giranî ra ameye vetene, netîceya krîzê zerrî de  dinyaya xo beidlnaye.

Cenazaya Akdogane Mezelanê Karşiyaka de ameye definkerdene û tazîyeya ci Camîya Merinosî ya Kuçeyê Surmelî ya Taxa Xarçokî ameye ronayene.

Xemê Akdogan rîyê zextê dewleta tirke ra dewa Pîrosa ya Elkêya Şirnexî ra 1985 de bar kerd şîye dewa Dotka ya  Gewerê Colemêrgî. La tîya zî zextan dewam kerd. Akdogane 1997 de bar kerd şîye dewa Xaportî ya qezaya Rêya Armuşê ya Wanî.

Akdogana ke xeylêk torn û qijê ci têkoşînê azadîye yê kurdan de ca genê, Meclîsê Dayîkayanê Haştîye yê Wanî de têkoşînê xo domnayêne. Xemê Akdogana ke emrê ci bi zilm û têkoşînê vera zilmî ravîyart rixmo ke extîyar a ameye destbendkerdene  û çend rey raştê şîdetî ameye. Akdogane têhetameyîşanê komelkîyan ê sey 8ê Adere û Newroze de tim tewr vernî de ca girewt.