Taxa Cumate ya qezaya Farqînî ya Amedî de de dayîke Şahîde Munara 65 serre pê viraştişê tenûre 8 domanê xo û 5 tornê xo kerdî pîl.

Şahîde Munar wexto ke 13 serre bîya dîyaye zewijnayene la 6 serran ra dima mêrdeyê ci kanserî ra dinyaya xo bedilnaye. Têkoşînê dayîke Şahîde heşt domananê ci reyde wina dest pêkerd. Dayîke Şahîde Jinnewsî ra qala cuya xo û çimeyê xo yê debare kerd. 

Şahîde Munar pare kerd ke wefatê mêrdeyê xo ra dima a baxçeyan de xebitîyaya û vat: ''7 kênayê mi û yew lajê mi est ê. Dima ke kênayê mi bîyî pîl ê zî mi de ameyî baxçeyan de xebitîyayî. Ez ge ge şermayêne la sewbîna çareya mi çin bîye. Lajê mi xebatanê partîye ra 13 serran zîndan de mend. Panc tornê mi zî, mi ser de mendî. Ma yew qayde debara xo kerdêne. Çewî pers nêkerdêne ke ma vêşan ê yan têşan ê.  Mi domanê lajê xo girewtêne, ma baxçeyan de xebitîyayêne.''

Dayîke Şahîde da zanayene ke 20 serrî yo a tenûran virazena û bi nê hawayî debara keyeyê xo kena. Dayîke Şahîde vat: ''Ez baxçeyan ra kîl, herre arê danê, nînan alawena û tenûre virazena. Nika mi kanserê cîldî est o. Doktorî vanê ke ez gereka nêvejîya tîje. La o çax kam do miqatê domanan bibo?  Ez mecbur a ke bixebita. Serra mi ra, çew karî nêdano mi. Mi zaf xizanîye dîye la mi ne xo ne zî domanê xo muhtacê çewî nêkerdî. Mi her karê xo bi sereyê xo kerd.''