Meclîsê Dayîkanê Haştîye yê Amedî verê banê komeleya xo de operasyonê qirkerdişê sîyasîyî protesto kerdî. Eşkerayîye de pankartê  “Dayik rûmeta ne, bijî berxwedana dayikan”  ame akerdene.

Dayîka Haştîye Nazîme Yurek wina vat: ''Dayîkê Haştîye 40 serrî yo serkêşîya haştîye kenê. Ganî her hetî ra vera nê zextan veng bêro vetene. Seba ke  dayîka ke hîrê domanê ci zîndan de yê pere şawito, ceza dîyaya ci. Ma nê qebul nêkenê. Dayîkê ma yê extîyarî zîndan de yenê tepiştene. No zulm o. Dayîkî bê haştîye yewna çî nêwezanê.''

Dayîkan ra Fafîye Yigit zî nê vatî:  ''Ewro domanê ma perûne zîndan de yê, eke ma pere meşawê, kam şaweno. Dayîkê ma yê extîyarî yenê destbendkerdene, nê welatî de edalet çîn o. Ma sey Dayîkanê Haştîye nê şermezar kenê. Ma veng danê Wezîrîya Edaletî, Serekkomarî heme kesanê wayîrê wîjdanî, wa destê xo  bidê serê wîjdanê xo û destê xo yê haştîye ma rê derg bikerê.''

Wekîla Partîya Çep a Keske ya Amedî Adalete Kaya zî hêrişo ke bi destê huqûqî vera Dayîkanê Haştîye yeno kerdene şermezar kerd û vat Dayîkê Haştîye têna nîyê.

Eşkerayîye bi slogananê  “Dayika me rûmeta ne ye”, “Jin, jiyan, azadi” qedîyayî.

Reyna Mêrdîn û Îzmîr de zî vera polîtîkayanê qirkerdişê sîyasîyî û destbendkerdişê Dayîkanê Haştîye eşkerayîye ameye dayene. Dayîkê  ke çalakîyan de ameyî têhet vera sereştişê keyeyan û destbendkerdişan nêrazîbîyayîş mojna û vat hinî bes o.