Platformê Cinîyan ê Dêrsimî bi wesîleya serrgêra diyîne ya Wendekara Zanîngehê Munzurî Gulîstane Doku 5ê çeleyê 2020î ra nata vînîbîyaye ya, Meydanê Seyîd Rizayî yê Dêrsimî de eşkerayîye daye. Keyeyê Doku, wendekarê Zanîngehê Munzurî,Wekîlê HDPyî yê Dêrsimî Alican Onlu  tewrê çalakîye bîyî.

Endamanê platformî ra Raife Yilmaz eşkerayîye wende. Yilmaze vist virî ke di serrî yo heme cipersayîşê Doku ra netîceyêke nêameyo girewtene û vat: ''Dozgerîye îdîa kerd ke aye xo kişto. Pirdê Dînarî de kamerayan ra dîmenê cinîyêke dîyayî ame vatene ke Gulîstane xo eşta Awbendê Uzu Uzunçayirî. La cigêrayîşan de netîceyêke nêame girewtene. Vergumanê yewinî Zaynal Abarakovo ke Gulîstane tewr peynî o dîyo têna rayêke îfadeyê ci ame girewtene. Derheqê şikdaran de çîyêk nêame kerdene la derheqê waye Aygule Doku de dewa ameye akerdene. Keyeyê Doku verê edlîye de çalakîye kerde û netîceya ci de walî û dozgerî reyde pêvînayîş kerd. Vatişê walî û dozgerî şikdaran pawenê. Dayîke Doku vato 'heta ma kênaya xo mevînê ma anêgerênî' naye ser o walî vato 'şima se kenê bikerê.'  No vatiş û tewirê înan ramojneno ke selahîyetdarî senî serebute muhîm nêvînenî. Her qala îqtîdarî sey şîdetî cinîyan rê agêreno. Ma do destur nêde şima kiştoxan bipawê, ma do hesab bipersê.''

Amde de zî Platformê Cinîyan ê Dicle Parka Hazale ya Yenîşehîrî de eşekrayîye daye. Endama Komîsyonê Semedê Doku Edalet Dîlane Ergul vat: ''Ma zanê ke Zaynalo ke Doku vînî kerda yeno pawitene. Şima pîya bi heme hêzê xo, hukmê dişmenîya vera cinîyan, leşkeran, polîsan, medya, qanûnan, polîtîkayanê hêrişkaran ê vera cinîyan wazenê îqtîdarê xo yê camêrdî cinîyan ra bipawê. Coka şima Zaynalî pawenê, tecawuzkar Musa Orhanî pawenê. Destê ma do pêsîrê kiştoxan û êyê ke înan pawenê de bê. Ma Gulîstanî canêverdenê.''

Komîsyonanê Cinîyan ê ÎHDyî yê ke bajaranê Kurdîstanî de yê derheqê Gulîstane Doku eşkerayîye daye. Eşkerayîye de ame vatene ke Zaynal Abarakov hetê dewlete ra yeno pawitene û ame vatene ke ê peyê naye cameverdê.