Dîcle Xabûre: Wext ameyo ke ma konfederasyonê cinîyan awan bikerê

Endama Koordînasyonê KJK’yî Dîcle Xabûre, bi wesîleya 8’ê Adare Roja Cinîyan a Mîyanneteweyîye qisey kerd û vat, “Seba ma cinîyan wext ameyo ke ma konfederasyonê xo awan bikerê. Ma do bi nê hawayî bi ser bikewê û bibê yew.”

Endama Koordînasyonê KJK’yî Dîcle Xabûre 8'ê Adare pîroz kerd û vat ke wext ameyo ke ma konfederasyonê cinîyan awan bikerê.

 “Ma 8’ê Adar a 2019’î afernayoxê azadîye cinî Rayber Apoyî rê pîroz kenê. Rayber Apoyî cinî tarîyîye ra vet û ard ver bi roşnayîye. Heman wextî de ez na roje cinîyan ê ke seba azadîye bedenê xo dayê verê adirî rê pîroz kena. Bi xoverdayîş û mucadeleyê înan têgêrayîşê azadîye cinî her ke şi aver şi. Sewbîna ez şexsê Leyla Guvene de yê ke nê xoverdayîşî rê serkêşîye kenê, embazê ke zîndanan de yê û xover danê înan rê zî pîroz kena.     

Seba ke cinîyî bibê bihêz, bibawer bê û bi îradeyê xo xo rayra berê Rayberîye lazim dî ke artêşêka cinîyan awan bikero. No bi xo derbeyêko pîl bi hemverê hişmendî û sîstemê pederşahîye de ke cinî çinê hesibnayêne. Rayber Apoyî tim bi nizdbîyayîşanê stratejîkan seba cinîyan gamê neweyî dayê eştene. Rayberîye heman wextî de bi ‘kiştişê camêrdî’, ‘aqityayîşo bêpeynî’ ûsn. ramot ke mucadele bireso azadî û serkewtişî.  

Serek Apo bi hawayêkê stratejîkî û zanayîşêkê zaf xorîyî problemê cinî ercneno. Naye ra Serekîye îdeolojîya xelasîya cinî ya 8’ê Adare xelata cinîyan ê Kurdan kerde. Birastî zî dimayo ke cinîyan xo zereyê îdeolojîya xelasîya cinî de dîyî bi hawayêkê aktîfî tewrê şorişî bîyî û cimatî mîyan ra zî wayîrvejîyayîşêko xeylî bihêz vejîya werte. Hendî cinî naye aîdê xo vînena û seba naye mucadele û xoverdayîşê xo kena pîl. Na rastîye xo awankerdişê organîzasyonanê cinîyan ê mîyanê cimatî de û bi heman hawayî artêşbîyayîşê cinîyan ê YPJ, YŞJ, YPS JIN de xo ramojnena.

Bitaybetî zî cinîyê Kurdî ewro hemeyê cinîyan ê dinya rê serkêşîye kena. Şero ke hemverê çeteyanê ke bi temamî temsîlkarê hişmendîya pederşahî yê yeno kerdene û binfînayîşê DAÎŞ’î nimûneyê nê yo. No xoverdayîş û mucadele bi hawayêkê eşkerayî xo hemraye Leyla Guvene de ramojneno. Seba ke tecrîdo girankerde yê serê Rayber Apoyî bêro wedartene, bêguman no tecrîd hemverê heme cinîyan de yo, nizdê çar mengan o ke hemleyêk daya destpêkerdene.     

Cinîya Kurde Kobanê de hişmendîya pederşahî bin fînaye û no mucadele pêl bi pêl vila bi. No şexsê YPJ’yî de vejîya werte. Ma nê heyecan û coşî ciwîyenê. Bi 8’ê Adare, bi slogana ‘do xoverdayîşê cinî azad bikero’ ganî ma heta 4’ê Nîsane tecrîdê girankerdeyî yo ke serê Rayber Apoyî de yeno bicaardene bin fînê û ê sîstemî birijnê. Serek Apoyî ma ra wina vat, ‘tena ez tecrîdkerde nêya, cinî û cimat bi temamî tecrîdkerde yê. Na yewe wina bizanê û seba nê mucadele bidê.’ Naye ra ganî hemeyê cinîyî yê Dinya û xusûsen cinîyê Kurdî ganî 24 saet mîyanê mucadele û xoverdayîşî de bê. Çunke ma zî mîyanê tecrîdêkê girankerdeyî de yê. Heta ma nê tecrîdî nêşiknê ma do nêeşkê bi asanîye biciwîyê.  

Ma sey KJK na îdea û bawerîye de yê ke ma do tecrîdî bin fînê. Seke her rey nika zî serkêşîya nê xoverdayîşî cinîyî kenê. Kulturê mucadeleyê azadîya cinî de her tim xoverdayîş vernî de yo. Bi xoverdayîşî ma resayê azadîye û bi xoverdayîşî ma bi ser kewtê. Bi slogana ‘ma do bi xoverdayîşî bi ser bikewê’ ma do Rayberê xo dir azad biciwîyê. Ma do sîstemê Îmraliyî birijnê, Rayberê xo dir azad biciwîyê. Ma cinî ça benê wa bibê ganî ma bi ruhê Leyla Guvene mucadele bikerê û xover bidê. Ganî ma meydanan de hemverê faşîzmî de sere wedarê, bibê yew veng, yew tewir. Seba ma cinîyan hendî wext ameyo ke ma konfederasyonê xo awan bikerê. Bi nê vîr û bawerîye ma do bi ser bikewê û bibê yew.