Komîteya Berze ya Fetwayan a Yewîya Alîmanê Îslamî ya Herêma Kurdîstanî derheqê têgêrayîşê cinîyan de fetwayêk weşanaye ke vera ci zaf nêrazîbîyayîşî ameyî mojnayene.

Seba tepîyaantişê fetwa zaf xîretî ameyî kerdeneû derheqê babate de vizêr heyetêkê cinîyan Parlamento de Yewîya Alîmanê Îslamî ya Herêma Kurdîstanî reyde kombîyayîşêk kerd. Sereka Heyetê Cinîyan dima eşkerayîyêk da û vat: "Kombîyayîş ra dima ma resayî nê netîce ke ganî Yewîya Alîman cinîyan reyde hîna zêde têkilîye bika ke alozîye nêra meydan."

Dima Serekê Yewîya Alîman Ebdulla Weysîyî dezgeh û sazgehî rexne kerdî û wina qisey kerd: "Heyf ke dezgehan eşkerayîyêka biprobleme kerde."

Naye ser o Sereka Rêxistina Caardişî ya Averberdişê Demokrasîyî û Heqanê Merdiman Dilsoz Zengene Rojnews reyde qisey kerd û vat: "Vizêr reyna vera cinîyan bêhurmetîye ameye kerdene. Eşkerayîya vizêrine de ame vatene ke cinîyan bi hawayêkê başî fetwa nêwende û nêeşkenê na babete seyr bikê. Ganî Heyetê Fetwayan efû biwazo."

"Parlamento, mamostayê zanîngehan û çalakîkerî zanenê ke na fetwa nîya. Eşkerayîya Heyetê Fetwayan ê vera  cinîyan nêna qebulkerdene. Ganî heqê cinîyan biamayêne pawitene la hedê înan nîyo ke cinîyan bi 'fetwayan' bipawê. Yeno pawitene ke na babete ser o ma kombîyayîşêk bikê. Ma do kombîyayîş de pêşnîyazan bigêrê û babete ser o munaqeşe bikê."