Endama Konseya Fermandarîye ya YJA Starî Pelşîne Koçgirî derheqê armanc û tesîrê çalakîya Zîlane (Zeynepe Kinaci) de ANFyî rê qisey kerd ke Zîlane 30ê hezîrana 1996î de Dêrsimî çalakîya fedayîye de şehîd bibî.

Qiseykerdişê Pelşîne Koçgirî bi kilmî wina yo:

''Embaze Zîlane 1996 de asta berze de felsefeya wayîrvejîyayîşê Rayber Apoyî mojna. Seke zanîyeno o çax vera Rayberîye komplo amebi kerdene. Embaze Zîlane komplo ferq kerd û çalakîya xo ya fedayîye kerde. Embaze Sema zî 1998 de vera xeta tasfîyekere zîndanan de bedenê xo da adirî ver. Embaze Gulane zî 1999 de vera xeta tasfîyekerde xoverdayîşêko pîl kerd û bîye serkêşa prosesî. Ez şexsê înan de pêro şehîdanê ma bi rêz û minetî yad kena. Ma eşkenê menga hezîrane sey menga perwerîya bi Rayberîye pênase bikerê. Ma soz danê ke têkoşînê şehîdan bi serkewtişî tacîdar bikerê.

30ê hezîrane 27 serrî xo pey de verdayî. Çalakîya embaze Zîlane xeylêk mesajî dayî. 1996 de vera Rayberîye suîkastê bi bombayan amebi kerdene û prosesê komployî dîya destpêkerdene. Çalakîya embaze Zîlane cewab da suîkastê vera Rayberîye. Aye bi çalakîya mojna ke embazî û perwerîya bi Rayberîye ganî senî biba. Embaze Zîlane çalakîya xo Dêrsim de kerde; çunke Dêrsim de qirkerdişê kurdan o pîl qewimîyabi. Aye waşt ke bi çalakîya xo qesasê Terteleyê Dêrsimî zî bigêra. 

Embaze Zîlane hem şorişgêrêka kurde bîye hem zî temsîlkara xeta fedayîye bîye. O çax vera gerîlayan hêrişê giranî est bîyê. Embaze Zîlane bi çalakîya xo tesîrê têkoşînê gerîlayan zî kerd. Embaze Zîlane çîyo ke mumkîn nêbi kerd. Aye dişmenî rê vat ke do nêeşko verê têgêrayîşê azadîye bigêro û eke hewce bibo ê do ganê xo feda bikerê. Rayber Apoyî coka vatbi 'Zîlane fermandar a, ma zî şerwanê ci yê.'

Çalakîya embaze Zîlan cigêrayîşê îrade, cuye û rayîrê cinîbîyayîşê cuye yo. Embaze Zîlane yena manaya îrade, tewir û wayîrvejîyayîşê cuye. Aye seba rêxistinîya cinîyan zî safhayêka verêne daye destpêkerdene. Rayberîye çalakîya aye sey manîfestoyêkî şirove kerd û artêşbîyayîşê cinîyan vist dewre. 

Her kesî qeydê vengî yê şehîdanê Mêrdînî temaşe kerdî. No tewirê ê embazan tewirê embaze Zîlane yo. Ewro koyan de gerîlayî ruhê Zîlane yê fedayî xo de kirişenê. Dewleta tirke ha hêrişê cinîyan  kena. La ma sey şerwananê YJA-Starî û Zîlane vera hêrişan xo ver danê. Ma qerardar ê ke têkoşînê Zîlane aver berê û erk û mesuldarîyanê xo verê aye de bîyarê ca.''