Besê Ercîncan bi wesîleya serrgêra 27. ya şehadetê Zîlane (Zeynepe Kinaci) ANFyî rê qisey kerd.

Beşê diyînî yê roportajê Erzîncanî ra tay noqtayê girîngî wina yê:

''Çalakîya Zîlane ya fedayîye ma rê terzê serkewtişî, şîfreyê nê terzî, rayîrê ci yê esasî mojnayî. Cinîyî bi serran hetê sîstemê serdestîya camêrdan ra ameyî kolekerdene, dest nîya heqan û azadîya cinîyan ser. Ewro cinîyî ganî azadîye ser o bifikirê, yew bibê û têkoşîn bikerê. Ganî cinîyî şorişê azadîya cinîyan biafernê. No zî pê rêxistinîya xopawitiş û xoverdayîşî beno. Şorişê cinîyan, sîstemê cinîyan, rêxistinîya konfederalîzmê demokratîkî ya cinîyan teyna seba Kurdîstan û Rojhelatê Mîyanênî ney seba pêro merdimatîye stratejîk ê. Ganî ma sey cinîyî Kurdîstan, Tirkîya û pêro dinya de serkêşîya têkoşînê azadîye bikerê.

Têgêrayîşê cinîyan heta ke xo raşt nêkerê, terzê xo raşt nêkerê nêeşkenê çîyê bînî raşt bikerê.Ma sey têgêrayîşê cinîyan ê kurdan xeta fedayîtîye ya Zîlane de bi xoverdayîş, keddayîş, cesaretî û fedakarî têkoşîn kenê. La ganî ma hetê îdeolojîk, rêxistinîye, performans û afernayîşî ra zî wina bibê. Ewro têgêrayîşê ma kerd ke felsefeya 'Jin, Jiyan, Azadî' ya Rayber Apoyî pêro dinya ra vila bibo. Ganî rêxistinîyê ma yê cinîyan serkêşîya her xebate bikerê. Ganî ma rexne bikerê û rexneyanê xo zî bidê.

Kulturê hemserekîye kulturê demokrasî, têdûştîye û edaletî yo. Ganî ma ney esas bigêrê. Ganî sîstemê hemserekîye hîna bêro xorinkerdene, hemserek û hemvervatoxî Meclîsanê Cinîyan reyde têbigêrê. Ganî cinîyî pêro xebatan de rêxistinîya xo ya xosere awan bikerê. Wa cinîyî pabeyê dewlete nêvinderê meseleyanê xo bi xo safî bikerê. Dewleta tirke vera cinîyan ê kurdan polîtîkayanê şerê taybetî ana ca. Ganî cinîyî nînan teşhîr bikerê. 

Cinîyî ganî caardişê perwerdeyê bi kurdkî û serbestkerdişê kurdkî xo rê bikerê erkê esasî. Cinîyê misilmanî esasê Îslamê Demokratîkî de, cinîyê elewîyî zî ganî esasê bawerîya xo de têkoşîn bikerê. Ewro Rojawan de rêxistinîya cinîyan, komunê înan zaf eşkera benê. Ganî Rojawan de şorişê cinîyan bêro xorinkerdene. Ganî Îran û Rojhelatê Kurdîstanî de cinîyî serkêşîya serewedaritişî bikerê. Başûr de cinîyî ganî vera meseleyan têkoşînê hemparî awan bikerê. Tirkîya û Vakurê Kurdîstanî de ganî cinîyî neteweperwerîye ra  fek vera bidê û zemînê hemparî ser de bêrê yewca.

Sîstemo faşîst tim keno ke cinîyan bikero kole û keyeyan de heps bikero. Cinîyî vera nê sîstemî wa seba azadîya xo her cayî de têkoşîn bikerê. Ma xeta azadîya cinîyan a Rayber Apoyî bi înadî her ca aver berê. Ma esasê Jin, Jiyan, Azadî de felsefeya ma ya azadîye û şorişê cinîyan ser bivisnê. Ma do ser bikewê.''