Endama Koordînasyonê KJKyî Besê Erzîncan bi wesîleya serrgêra Komployê 9ê Teşrîna Verêne yê vera Rayberê Şarê Kurdî Abdullah Ocalanî ANFyî rê qisey kerd.

Besê Erzîncan qiseykerdişê xo de nê noqtayan ser de vinderte:

''Komployê Mîyanneteweyî 9ê teşrîna verêne ya 1998î de dest pêkerd. Nê komployî armanc kerd ke şexsê Rayber Apoyî de şarê ma û têgêrayîşê ma çin bikero. Rayber Apo 25 serrî yo binê şertanê giranan de tecrîdkerde yo. Bi nê tecrîdê vera Rayberîye yeno waştene ke çimê pêro hêzanê azadîgîran bitersê. Coka erkê pêro hêzanê azadî û demokrasî yo ke vera tecrîdê Îmraliyî têkoşîn bikerê.

Rayber Apo û têkoşînê azadîye yê Kurdîstanî seba pêro merdimatîye hêvî bîyê. Coka hêzanê kapîtalîstan hêrişê Rayberîye kerd. Çunke kapîtalîzmî Rayber Apo sey gefêk dî. Bi Komployê Mîyanneteweyî nê hêzan kerd ke verê azadîya cinîyan û şaran bigêrê. Rayber Apoyî tim sîstemo hegemonîk rexne kerdêne. Ey paradîgmaya xo ya azadîye zî ney ser o naye ro. ey kerd ke seba pêro dinya yew sîstem awan bikero.  

Komployo Mîyanneteweyî heman wextî de vera têkoşînê azadîya cinîyan zî ame kerdene. Rayber Apoyî tim giranîye daye azadîya cinîyan û tim xîret kerd ke cinîyî her warî de biasê û têkoşîn bikerê. Ey embazîya cinîyan rê giranîye daye û seba ke cinîya azade biresa têkoşîn kerd. Mîyanê partîye de zî Rayber Apoyî qetî sîstemê serdestîya camêrdan qebul nêkerde û kanwazîya embazanê camêrdan tim rexne kerd. Rayber Apoyî cinîyî bi rêxistin kerdî, verê cinîyan akerd. 1995 de kongreya cinîyan a yewine de YAJK ame îlankerdene. YAJK raşta raşte pabesteyê Rayberîye bi. Bi nê hawayî cinîyî bîyî artêşe. 

Nê pêro kar û xebatê Rayberîye seba sîstemê serdestîya camêrdan gef bîyî. Nê sîstemî coka hêrişê Rayberîye kerd. Sîstemê kapîtalîstî tim waşt ke cinîyî mîyanê komelî de bibê kole. La Rayberîye vera ney vejîyaye. Dewletanê bi eqlê camêrdan bi aktîfî mîyanê Komployê Mîyanneteweyî de cagirewt ke cinîyî azad nêbê.

Coka ewro têkoşînê cinîyan eşkeno Rayber Apoyî azad bikero. Ewro pêro cinîyê dinya dormeyê felsefeya Rayber Apoyî de yenê têhet. Tewr peyên Îran û Rojhelatê Kurdîstanî de bi şîarê 'Jin, Jiyan, Azadî' cinîyan sere wedaritbi. Tîya de zî eşkera bi ke şorişê Kurdîstanî senî tesîr keno.  Sey cinîyî ma eşkenê bi pîlkerdişê têkoşîn û xoverdayîşê xo Komployê Mîyanneteweyî pûç bikerê. Sey cinîyan ganî ma serkêşîye bikerê, fikranê Rayberîye pratîze bikerê û vila bikerê.

Rayber Apo serkêşê têkoşînê azadîye yê cinîyan o. Eke ma xeta azadîya cinîyan a Rayber Apoyî fam bikerê û bîyarê ca eşkenê cewabê komployî bidê. Rayber Apo 25 serrî yo vera sîstemê îşkence û qirkerdişî yê Îmraliyî xo ver dano. Rayber Apo serkêşê nê dewr û merdimatîye yo. Coka ganî ma bi xurtî wayîrê Rayberîye vejîyê. Seba cinî û ciwanan ganî ma bi pêro hêzê xo seba azadîya Rayberîye têkoşîn bikerê.''