Endama Fermandarîya Pêroyî ya YPJ’yî Newroz Ehmede derheqê Hamleya Firtineyê Cizîre û mucadeleyê YPJ'yî de ajansê ma rê qisey kerd.

Newroz Ehmede derheqê beşdarbîyayîşê YPJ’yî yê Hamleya Firtineyê Cizîre de wina va: “YPJ’yî bi moral, kelecanî û qerardarîya pîle dest bi hamleye kerd. Ma waşt DAÎŞ bî destê YPJ’yî biqedîyo. Xebera ma bi zor û zehmetîyanê nê operasyonî bîye û xora tecrubeyê  hêzanê ma yê şerî zî bî. Hêzê ma seba ke cinîyanê Êzîdîyan ê destê DAÎŞ’î raxelesnê, zaf bi hêrs û bê sebir bîyî. Se ke şima zî vînenê, YPJ cepheyê tewr verî de ca gêno û serkêşîye keno. Ma do heta peynîye zereyê nê şerî de bê û no derheq de ma qerardar ê. YPJ nê yî, xo rê sey wezîfe vîneno.”

ŞER RA DIMA ZÎ MA ESTÊ

Newroz Ehmede wina dewam kerd: ”Ma hêvî kenê ke wextêko nêzdî de biqedîyo. Bêguman Fermandarîya YPJ’yî zereyê pêroyê operasyonanê QSD’yî de ca girewto û wezîfeyê xo, her kesî ra hîna zêde ardo ca. Nê şerî ra dima, ma do bi beşdarîyêka hîna xurte û pête, pêroyê operasyonan de cayê xo bigîrê. Çunke DAÎŞ’î şexsê cinîyan de îradeyê şaran şikitbi. Çira Şengal de handê camerdî kiştî û cinîyî remnayî? Ma hamleya peyêne de dî ke domanê qijkekî zewecnaye û cinîyî xeylî camerdan de zewecnayê. Şengal, Kobanê û cayanê bînan de, waşt ke manaya cuye bikişo. DAÎŞ vera qedîyayîşî yo. La DAÎŞ’î bi xo beyanat da ke o do bi hucreyanê nimiteyan hêriş bikero. Rast a zî her çiqas ke senî ke biqedîyo biaso zî, hêrişê xo dewam kenê. Xeylî bajaranê ma de teqayîşî qewimîyenê, sivîlan rê hêrişî yenê kerdene.”

HÊZÊ MA YÊ TAYBETÎ DO WEZÎFE BIKERÊ

Fermandara YPJ’yî Newroz Ehmede ard ziwan ke, no derheq de qisawetê înan estê û wina va: “YPJ’yî hêzê xopawitişî û zîhnîyetê pawitişî yê meşruyî xo rê esas girewtê û bi nê qeyde awan biyo. Bêguman na babete de ganî ma wextêko derg mucadele bikê.

Ewro ra dima, hêzê cinîyan ê taybetî do operasyonan de, hetê tewr verî de cayê xo bigîrê. Çunke mucadeleyê vera DAÎŞ’î yê ewroyî ra dima, hîna zêde profesyonelîye wazeno. No çarçewa de hêzê ma yê ke ameyê perwerdekerdene û amadekerdene do serkêşîya operasyonan bikê. Pêro hêzê YPJ’yî do xo goreyê nê operasyonan amade bikê.”

MUCADELEYO PÊT O KOMELKÎ

Newroz Ehmede qiseykerdişê xo wina domnayî: ”Asta komelkîye esta û ma ci ra vanê hamleya hîrêyîne. Ma destur nêdanê ke zîynîyetê DAÎŞ’î xo newe ra rêxistin bikero. Zereyê komelî de xeylî kesê ke wayîrê nê zîhnîyetîyê estê û xeylî kesî vera DAÎŞ’î bêîrade vindenê. Reyna zereyê komelî de tersê DAÎŞ’î yo pîl esto.

MA DO ZÎHNÎYETÊ DAÎŞ’Î BIQEDENÊ

Ganî ma zîhnîyetê xobîyayîş, azadî û cesaretê xopawitişî bidê pêroyê komelî. Hêzê ma xeylî wexto ke zereyê şerî de yê. Heya no şer de hêzê ma bîyî wayîrê yew tecrubeyê muhîmî. La ganî nê hêzê xo newe ra binirxno û xo newe ra perwerde bikero. Ma wazenê ke zîhnîyetê DAÎŞ’î yê zereyê komelî biqednê.”

ŞER ZÎ, WEZÎFEYÊ YPJ’YÎ ZÎ NÊQEDÎYAYO

Newroz Ehmede peynîya qiseykerdişê xo de wina va: “Herêmanê ma ser tehlîkyeê pîlî estê. Ganî ma nê tehlîkeyan meydan ra pak bikê. Ma nêeşkenê vajê êdî şer qedîyayo, yan zî wezîfeyê leşkeri yê YPJ’yî nêmendo. Esas giranîye naye ra dima do dest pêbikero. Naye ra zî ma hetê fehmî, taktîkî, rêxistinî, tenîkê xurt û dewlemendî ra kenê ke xo aver berê.”