Endama Meclîsê Leşkerî yê Dêra Zorî û Fermandara YPJyî Lîwa Ebdullah serra 2019î ercnaye û vat bi rêxistinbîyayîşê xurtî yê cinîyan serra 2020î de îşxal do bêro çinkerdene.

Ebdullahe vat: "Binkerdişê DAÎŞî  gamêka tewr pîle û tarîxîye bi. No seba ma û seba şerwanê YPGyî zî rûmetêko pîl bi.  QSDyî bi tewirêkê merdimîye têgêra û no serrkewtiş pêşkêşê şarê ma kerd. La heyf ke na şayîya şarî temam nêbîye. Seke şima zî zanenê 3 mengan ra nata ma binê îşxalêkê pîlî de yê. Dewleta tirke har bîye û wazena ke pêro herême îşxal bika. Nêzdîyê 2 serrî yo  ke Efrîn îşxal kerd la her roje Efrîn de hêzanê ma çalakîyêk kerde. Yewîya cinîyan a herême hêzanê îşxalkeran tersnena. Bi taybetî naye ra hêrişê cinîyan kenê. Cinîyê erebî reya verêne tersayêne vatêne 'ma nêeşkenê xo bipawê'. La dima tewrê xoverdayîşê ma bîyî û dî ke eşkenê. Ez eşkena vaja ke bi tewrbîyayîşê cinîyanê ereban ma DAÎŞî girewt mîyanê çemberêkî.

Ma ewro pêro Xoverdayîşê Rûmetî de sey cinîyan cagênê. No xoverdayîş xoverdayîşêko tarîxî yo û rolê cinîyanê kurdan û ereban tede eşkerakerde yê. Ma şarê xo rê soz da ma vat ke ma pawitoxê nê erdî yê. Coka ma do heta çila peyêne ya gonîya xo vera DAÎŞî û hêzanê îşxalkeran şer bikê û xo ver bidê. Ma do sozê xo bîyarê ca.Vera nê îşxalan rojêke zî xoverdayîşê ma nêvindert û do nêvindero. Pêro cinîyê têkoşêrî ser kewtî. Nê pêro bi bedelanê giranan ameyî caardene. Ez şerwananê cinîyan ê YPJyî û cinîyanê pêro dinya fîraz kena. Seba ke ma îşxalan vindertî ez venga cinîyanê dinya dana ke yew bibê, rêxistina xo xurtêr bikê ke ma bieşkê erdê xo, welatê xo û merdimîya xo bipawê û ma bi rêxistinbîyayîşê xo yê xurtî îşxalan çin bikê. Ez serra 2020î ya pêro cinîyan û yê şarê herême fîraz kena û hêvî kena ke ma do ameyox de rojanê azadan û biaramîyan bivînê."