Fermandara Qerargehê Merkezî yê YJA Starî Zozan Çewlîge û Endama Konseya Leşkerî ya YJA Starî Şerda Mazlum Gabare, beşdarê yew programê taybetî yê Medya Haber TV’yî bîyî û 8’ê Adare Roja Cinîyan û xoverdayîşê grevê vêşanîye ercnayî. Cinîyan ê fermandaran va no wisar do bibo wisarê cinîyan û seserra 21’î do bibo seserra şaran û cinîyan. Gabare va wisar do bi çalakîyan bêro û reyna va vatiş qedîyo û wextê vatişî zî qedîyo.

RAYBERÎYE CINÎYÎ KERDÎ WAYÎRÊ NASNAMEYÎ

Zozan Çewlîge: “Ez her çiyî ra ver wazena ke bi weîlayê Roja Cinîyan a Mîyanneteweyîye, 8’ê Adare yê Rayber Apoyî pîroz bika. Çunke cinîyan ê Kurdî de manaya 8’ê Adare bi destê ey ameya ca û ma saya ey de reste na roje û bîyê wayîrê na felsefeye. Rayber Apoyî cinîyan de embazîye ya raste naya ro û cinîyî bi nê ferasetî bîyî wayîrê nasnameyî. Ez Rayber Apoyî silam kena. Ewro Rayberê ma, cinîyî û pêroyê şarê ma binê tecrîdê giranî de yê. Serra 2019’î bi şert û mercanê cîyayan ameye. Ez serê de vera nê şert û mercanê giranan, xoverdayîşê Leyla Guvene, Maxmur, Başur û pêroyê zindanan silam kena. 

MA SÎSTEMÊ KOLETÎYE RED KENÊ

Ma cinîyî çi wazenê û vera çiyî mücadele kenê? Na perse seba ma zaf muhîm a. Ma her çiyî ra ver zîhnîyetê camerdîye yê serdestî yê 5 hezar serrîyî, qetlîamê ke şaran rê kerdê, Rojakewtena Mîyanêne û pêroyê dinyaye de cinîyan rê tecawuz o sey sîstem yeno bicaardene, qirkerdişê doman û cinîyan red kenê. Ma cinîyê Kurdî vera ferasetê AKP-MHP’yî yê serdest, zordar, faşist û netewperestî mücadeleye xo domnenê. Ma cinîyê Kurdî bi felsefeya Rayber Apoyî bîyî wayîrê zanayîşî û bîyî wayîrê nasnameyî û wayîrê mucadeleyî. Ma bi xoverdayîşê Sarayan yew binge viraşt. Têgêrayîşê Azadîye yê ma de binge Saraye eşto û aye cuya demokratîke, seyyewbînîye, azade musnaya ma. Na xêzê de, ma vera sîstemî mücadele kerd û ewro bîyî wayîrê îrade, nasnameyî û seba pêroyê cinîyanê dinyaye bîyî sey nimûne. Ewro na xêzê hetê Leyla Guvene ra yena temsîlkerdene û bi xoverdayîşê xo morê xo dana proses  ro.

GANÎ LEYLA GUVENE BAŞ BÊRO FEHMKERDENE

Ewro hem hetê îrade, hem hetê mucadelekerdiş û hem zî hetê zanayîşî ra sewîyeya ke cinîyî restê ci sewîyeyêka zaf berze ya û eşkera yena dîyayene. Ewro vindertişê Leyla Guvene tena vindertişê cinîya Kurde nîyo û seba pêroyê cinîyan zaf muhîm o. Çunke Leyla vera yew sîstemî serê wedarito. Leylaye vera sîstemê koledarî, vera sîstemê tecrîd û îşxalkarî serê wedarito. Leyla tena yew cinîye nîya, yew xêze ya, yew uslûbe ya.Ganî Leyla Guvene baş bêro fehmkerdene. Pêro cinîyî û bindestî ganî Leylaye baş bişinasnê. Leyla mergî ra zîyaderî cuye ra hes kena û no rayîr de mucadele dana.

SESERRA 21 DO BIBO SESERRA ŞARAN Û CINÎYAN

Ewro Leyla Guvene vera nê zîhnîyetî mucadele kena. Leyla Guvene vera polîtîkayanê AKP-MHP’yî yê tekanetî, dewletî û zîhnîyetê qirkerdişî, bi vindertişê xo mucadele kena û na xêze de bîya serkêşe. Û ma bi nê xoverdayîşî vera 8’ê Adare şonê. Xora 8’ê Adare zî xêza mucadeleyî yê vera ferasetê serdestîye temsil keno. Ma no fehm kerdo ke seserra 21’î de Leyla Guvene seba haştîye, demokrasi, edalet û seyyewbînîye û seba cuya azade venga merdimahîye dana. Leyla Guvene bi mucadeleye xo kena ke sîstemê serdestî yê camerdîye birijno û seba pêroyê şaran cuya azade awan bikero.

Wezîfeyê ma zî o yo ke ganî ma Leylaye baş fehm bikerê û bi rûhê 8’ê Adare biwirzê payan ser û vera nê zîhnîyetî, hêzê cinîyan rêxistin bikerê. Pêroyê hêzê emperyalîstî ewro hêrişê cinîyanê wayîrê zanayîşî kenê û cinîya azade xo rê sey xetere vînenê. Rast a zî seserra 21’î do bibo seserra cinîyan û şaran. M abi na bawerî û ferasetî mücadele bikê û serra 2019’î bikerê serra serkewtişî.

Ma bi îdîaya şikitişê tecrîdê serê Rayberîye û şarê xo dest bi serrê kerd. Xora  Leyla Guvene zî bi xoverdayîşê xo venga ma da. Leyla bi beden û qerardarîya xo venga pêro dost, welatperwer, hevalan û her kesî da. Çiyo ke ma rê keweno no yo ke ganî ma verê xo biaçarnê xoverdayoxan ser. Çunke no vengê azadîye yo.

Ma gerîlayê YJA Starî  kewenê prosesê mucadeleyî yê neweyî. Ma zî do cewab bidê nê vengdayîşî û kerdenê ma zî do bibê. Çunke Leyla Guvene vatişê xo yo peyên vato. Êdî wextê vatişî nê, wextê kerdişî yo. Ma do bi ruhê Zîlane yo fedaîyî beşdarê prosesi bibê û no derheq de soz danê pêroyê şarê xo û 8’ê Adare yê pêroyê cinîyan pîroz kenê.”

CINIYAN Ê DINYAYE MA DE TESÎR VIRAŞT Û NIKA ZÎ MA TESÎR KENÊ

Şerda Mazlum Gabare: Her çiyî ra ver, Rayber Apoyî ma kerdî wayîrê nasname û zanayîşî û naye ra zî ez ey bi heskerdiş û hurmet silam kena. Ma sey Têgêrayîşê Cinîyan, mucadeleyê cinîyan ê dinyaye ra xeylî çiyî musayî û ma zî bi mucadeleyê xo xeylî çiyî musnayî cinîyanê dinyaye. Ganî ma her çiyî bi xo nêdê destpêkerdene. Tivana qey mucadeleyê cinîyan bi ma ameyo destpêkerdene, hawayo winasî esto û no xelet o. Tabî ganî ma bi nîyadayîşo oryantalist, her çiyî bi rojawanî zî nêdê destpêkerdene. Cîyayîyê ma estê. Ganî merdim baş name bikero. Ma Têgêrayîşê  Cinîyan ê Kurdî, ferqa xo Rayberîya xo ra gênê.

 Rayberîya ma cinîyî kerdî wayîrê îrade û hêzî. Têgêranê binan de biewnê, heya cinîyî sîstemî rexne kenê, red kenê, la vera ê sîstemî sîstemêko hîna pêt awan nêkenê. Yanê vera sîstemê serdestî yê camerdan de mucadeleyî ameyê kerdene, la alternatîfî zaf nêameyê ronayene. Persê sey cuya azade ganî senî bo, karaktere cinîye ganî senî bo, cinîyî senî eşkenê rolê ke ci rê ameyê birnayene ra bivejîyê teber, nêameyê cewabkerdene. Ferqa Rayberîya ma tîya de vejîna meydan û cinîyê têgêrayîşê ma wayîrê nê vindertş û ferasetî yê.

YJA STAR HÊZÊKO ANTÎMÎLÎTARÎST O

Rayberîye no bi rêxistinê cinîyan aferna. Merdim ke tarîxê şorişê dinyaye de biewno vîneno ke, mabênê hêzanê leşkerîyan de cinîyî ca gênê la tewr zêde wezîfeyanê sivikan de, sey hetkaran ca gênê û barê şorişî yo esasî vileyê înan ser  nîyo. Ma de senîn o! Ma de cinîyî benê fermandar, hetê tewr verî de ca gênê. Kişt û kaleka şerî de nê, rasterast zereyê şerî de yê. No îrade û xorabawerbîyayîşî aferneno û zanayîşî keno berz. YJA Star hêzêko antîmîlîtarîst o. Hêzêko antîemperyalîst û antîfaşist o.

Wexto ke Rayberî rêxistinê cinîyan awan kerd wina va: “Armancê yew leşkerîye o yo ke dinyaya bê leşkerîye awan bikero”. Çunke cayo ke serdestîye bibo û seyyewbiniye ke çinbo, uca de leşkerîye yena ser. Ma eşkenê hêzê YJA Starî wina tarif bikê: xopawitişê cinîyan sîstematîze keno û yewîya cinîyan aferneno. Dinyaye de xeylî tesîrî dayî viraştene û bi taybetî zî Rojakewtena Mîyanêne de, hetê cinîyan ra sey yew sîstem ame qebulkerdene. Rojava û Şengal de, YJA Star sey nimûne ameyo girewtene û nê cayan de rêxistinê cinîyan ameyê ronayene.

YJA STAR SEY  HÊZÊKO HERÊMÎ AWAN BI; LA O DO HER CA DE BIBO SEY SÎSTEM

Mîsal, bala cinîyanê Amerîkaya Latine zî anceno. Ma cinîyî wina yê; îstirê çimanê ma sey yewbînî yê. Derd û dejê ma sey yewbînî yê la derdê ma yo sey azadîye zî esto. Ganî şabîyayîşê ma zî bibo yew. Ganî no derheq de sazîyê ma zî bêrê awankerdene. Nika problemê ma yo sereke o yo ke ganî sîstemê xopawitişê cinîyan bêro ronayene.YJA Star sey hêzê xopawitişî yê herêmîyî destpêkerd la ma wazenê ke no sîstem hîna avêr şoro û hetê pêroyê cinîyanê dinyaye ra bêro qebulkerdene. Sey nimûne; ganî 8’ê Adare hawayê roşanî de nêro pîrozkerdene. Çunke 129 cinîyî ameyê vêşnayene û ganî ma înan xo vîr ra nêkerê û hesabê înan bipersê. Roja heyfgirewtişî ya.

Ma ra vanê “ Rayberê şima yew camerd o”. Verî nêzdîbîyayîşê winasîyî bîyî la bi şinasnayîşê Rayberî, xeylî kesî nê fikrî ra kewtî dûrî. Çunke her kes vîneno ke Rayberê ma çiqas qîymet dano cinîyan. Şexsê Leyla Guvene de xoverdayîşê cinîyan vejîyo meydan. Leyla vera pêro teda û zordariye, bi bedenê xo mücadele kena.

Leyla Guvene seba ke çalakîya xo biqedno yan zî hepsxane de nêmiro serbest ameya veradayene. Çunke eke hepisxane de ke bimerdêne, dewlete kewtêne zor. Heto bîn ra Rayberîye de pêvînayîş ame kerdene la Leyla reyna zî çalakîya xo nêqedêne. Çunke Leyla Guvene ameyeyê xo û ê pêroyê cinîyan, şikitişê tecrîdê serê Rayber Ocalanî de vînena. Leyla Guvene na rastîye musnê pêroyê cinîyanê dinyaye û naye ra zî pêroyê cinîyê dinyaye Rayber Ocalanî meraq kenê û wazenê ke bişinasnê.

Ganî ma Rayberîya xo hîna zêde bidê şinasnayîş. Cinîyê dinyaye ke îdeolojîyê Rayberê ma ke hîna baş nas bikerê, felsefeya ci ke hina zêde fehm bikerê, o wext hîna zêde ci rê wayîrîye kenê û qebul kenê. O wext ê do bivînê ke xelasîya cinîyan bi felsefeya ey mumkin a.

Ma ke Rayberîye baş bidê şinasnayene, o wext pêroyê cinîyan do sey Rayberê xo bivînê. Xora çîyêko winasî zî esto. Zaf zêde cinîyî beşdarê mucadeleyî benê û no zî yew îşaret o. Ewro YJA Star de tena cinîyê Kurdî nê, Ereb, Hîndî, Katalonî, Fransîyî, Amerîkanijî mabênê ma de estê. Nê cinîyî tena seba ke koyanê Kurdîstanî bivînê nêameyê.